Link açıqlığı

Dnepropetrovskta Qırımdan köçip kelgenler içün yardım noqtasında Qırım.Aqiqat mühbirine ücüm ettiler


Dnepropetrovskta Rusiye işğali sebebinden yarımadanı terk etken qırımlılar içün açılğan yardım noqtasında onıñ vekili Qırım.Aqiqat neşiriniñ mühbiri Svetlana Yereşçenkoğa ücüm etti.

Zarar körgen mühbirniñ aytqanına köre, o, qırımlılarnıñ yerleştirüvi boyunca ştabnıñ areketi ile tanış olmaq içün Dnepropetrovskqa qaçaq rolünde kelgen eken.

«Mende Dnepropetrovskta qırımlılarnı, başqa regionlarda olğanı kibi, musafirhanelerge degil de, yataqhanelerge yerleştirgenleri aqqında malümat bar. Bunı teşkermek maqsadım ile Dnepropetrovskqa keldim ve yarımadanı terk etmege mecbur olğan qaçaq kibi qayd etilmege tırıştım», – dep tarif ete Svetlana Yereşçenko.

Dnepropetrovskqa kelip, jurnalist yardım ştabına muracaat etti. Anda boş ayatta sofrada aş payı ile olğan bir qaç torbaçıqnı taptı. Kimge ayırılğanı belli degil.

Svetlana Yereşçenko olarnı fotoğa çıqardı. Faqat bunı qomşu kabinette bulunğan belgisiz adam kördi. O, kabinetten çıqıp, ştabnıñ binasında foto çıqarmağa yasaq olğanını aytır eken, jurnalistke atıldı. O, özüni ştab yolbaşçısınıñ muavini olaraq tanıttı. Erkek jurnalistten fotoapparatnı küç ile çekip çıqarıp, öz kabinetine alıp ketti.Soñra milis hadimlerini çağırdı.

«Milis hadimleri kelgende, men fotoapparatımnıñ hırsızlanğanını ve jurnalsit faaliyetime keder etkenlerini ayttım. Qanunnı bozğanlarğa nisbeten qarar çıqarmağa rica ettim. Milis hadimleri ise meni odadan türtmege başladılar. Men qırımlı olğanımnı ve yardım körmek içün mında kelgenimni añlattım. Amma bu da yardım etmedi. Meni soqaqqa alıp çıqardılar. Soñra fotoapparatımnı qaytardılar», – dedi Svetlana Yereşçenko.

Ştabda etilgen fotoresimler ve ziddiyet videosı yoq etilgendir.

Jurnalsit ziddiyet yüz bergen yerge milis hadimlerini çağırdı. Al-azırda olar vaziyetni ögreneler.
XS
SM
MD
LG