Link açıqlığı

Saatnıñ esas haberi

Qırımtatarlar «Vatan!» ve «Ukrainağa şan-şerefler olsun!» dep, Çatır Dağğa çıqtılar


Sürgünlikte şeit ketken qırımtatar halqınıñ hatırasına bağışlanğan Qırımnıñ eñ yüksek dağlarınıñ birisi Çatır Dağğa köterilüvde tahminen 2 biñ insan iştirak etti.

Tedbirniñ teşkilâtçıları qırımtatar milliy Meclisi, «Küreş» Qırım milliy küreş federatsiyası, Qırım yaşlar cemaat teşkilâtları oldı, dep haber ete Qırım.Aqiqat mühbiri.

Saba, köterilüvden evel, adet üzre, qırımtatar halqınıñ tarihında facialı kün – 1944 senesi mayıs 18 – sürgünlik künü arfesinde Anğara boğazında dualar oquldı.

Bundan soñ toplanğanlar, hususan genç yigit ve qızlar, ellerinde qırımtatar bayraqlarını tutıp, dağnıñ eñ yüksek noqtası olğan (deñiz seviyesinden 1527 metr) Eklizi-Burunğa yol aldı.

Tahminen 3,5-4 saatlı yol devamında bazı iştirakçiler Ukraina bayraqlarını köterdi. Bunıñnen beraber, Anğara boğazında teşkiliy komitetiniñ vekilleri tarik olmasın dep, iştirakçilerge mavı-sarı bayraqlarnı almamaq rica ettiler.

İnsanlar: «Millet! Vatan! Qırım!», «Qırımtatar halqına şan-şerefler olsun!» ve «Ukrainağa şan-şerefler!» dep, köterile edi.

Çatır Dağğa çıqıp, numayışnıñ iştirakçileri qırımtatar bayrağını tikledi, namaznı qıldı, ve sürgün qurbanlarınıñ hatırasınа dua oqudılar. Bundan da ğayrı, qırımtatar halqınıñ «Ant etkenmen» gimni icra etildi.

Teşkilâtçılarnıñ sözlerine köre, bu sene 5-nci köterilüvde tahminen 2 biñ insan iştirak etti.

1944 senesi mayıs 11 künü İosif Stalin «Qırımtatarlarnıñ Qırım ASSR-dan Özbek SSR-na sürgün etilmesi aqqında» qararnı imzaladı. Mında qırımtatarlar «faşist yardımcıları» olaraq belgilene edi. Mayıs 18-20 künleri tahminen 200 biñ insan sürgün etildi.
XS
SM
MD
LG