Link açıqlığı

Bugün Aqmescitniñ Merkeziy rayon mahkemesinde yarımadanıñ qırımtatar ealisi iştirak etken kütleviy yol qapatıluvı ile bağlı bir qaç işni baqtılar.

Qırım.Aqiqat mühbiri bergen malümatqa köre, bir vaqıtlı kütleviy bulunuv ve cemaat yerinde, cayav keçitinde areket etüv içün mahkemeci Yuriy Güleviç Seyran-Can İbragimovge Rusiye Federatsiyasınıñ memuriy qanun bozuvı aqqında kodeksiniñ 20.2.2. maddesi, 1-nci qısmına köre, 10 biñ ruble miqdarında cezanı belgilemege qarar aldı.

Qararğa binayen, para cezası vesiqanıñ işlep başlanmasından 60 kün devamında PAO ÇBRR-ge ödenilmek kerek.

Mahkemeciniñ fikrince, işbu memuriy qanun bozuvı öz aksini mahkeme işniñ baquvında taptı. Ayırıca, o, adise yerinden olğan videoğa esaslana, mında İbragimovnıñ mayıs 3 künü saat 15:30 Aqmescitte, Sevastopolskaya soqağında Zapadnaya avtostantsiyası yanında cemaat yerinde iştiragi ve areket etüvi tasdiqlanıla.

Mezkür areketler, mahkemeciniñ tüşüngeni kibi, naqliye ve piyadelerniñ areketine keder ete edi.

İbragimovnıñ özü ise qabbatnı tanımadı. O, Zapadnaya avtostantsiyası yanında olğanını, amma yolnı keçmegenini ve naqliye areketine keder etmegenini bildire. Faqat mahkemede bu delillerge qulaq asmadılar ve İbragimovnı işbu qanun bozuluvında qabaatlı olaraq tanıdılar.

Qabaatlanğan insan Qırım.Aqiqatqa bu qararğa apelâtsion basamaqlarda itiraz bildirecegini haber etti.

Aynı böyle qarar bugün mezkür tedbirde iştirak etken qadınğa nisbeten de alındı. Böyle iş boyunca 17 yaşında olğan student de keçe, faqat oña qarar daa ilân etilmedi, mahkemeci toplaşuvnı mayıs 7 kününe keçirdi.

Keçken raatlıq künleri tahminen 100 nefer qırımtatarı Qırım paytahtından Aqyarğa ketken yolnı blok etip, qırımtatar halqınıñ lideri Mustafa Cemilevge Qırımğa kelmege yasaq etilmesine qarşı narazılıq aktsiyasını ötkerdiler. Qırım «GİBDD» hadimleri bu yerge kelip, yolnı blok etmemege rica ettiler ve memuriy ceza aqqında tenbiyelediler.
XS
SM
MD
LG