Link açıqlığı

Sevastopolde aktivist qızlar Qırım bu «iç şübesiz» Rusiye olğanını er keske isbat etmege ıntılalar.


Bugün Aqyarnıñ Primorskiy caddesinde «Bizlerde er şey – bir manalı!» degen şiar altında «Zabitlerniñ qızları» gençler areketiniñ aktsiyası ötkerildi.

Özüni akimlikke tiklegen «akimiyet»niñ seslerinden biri КИА bildirgenine köre, bu areket «Сеть» adlı leyiha çerçivesinde meydanğa ketirilgen edi. Onıñ reberi İrina Afanasova eminliknen bildire ki, bu areketniñ faal iştirakçı qızları «Qırım – bu Rusiyedir» fikirini pekitmek kibi vazifeni özüne aldılar.

«Qırım, qanun boyunca referendum ve arbiy küçlerniñ tesiri iç olmağan tarzda, öz mekânı Rusiyege qayttı, amma İnternette yarımada içün informatsion cenki toqtamay. Bizler Qırım ve Sevastopolniñ Rusiye Federatsiyasınen qavuşması – em yarımada sakinleri, em de başqa rusiyeliler içün büyük bir quvanç olğanı aqqında teren fikirni er keske yetkizmege isteymiz», – dedi Afanasova.

Aktsiya çerçivesinde areket iştirakçileri Aqyarnıñ yalı kenarında bayraq, transparantlar ve Rusiye Prezidenti Vladimir Pütinniñ süretleri ile yürüş yaptılar.

Qırım Rusiye taraftan endi zapt olunğandan soñra, Pütin resmiy sürette rusiyeli arbiyler «mart 16 künü olğan referendumda Qırım sakinleriniñ serbest rey berüvini teminlegen»lerni tasdıqladı. Amma bundan evel o, qayd etilgen «referendum» azırlanğan vaqıtta Rusiye arbiylerniñ Qırımda bulunğanını kesen-kes red ete edi.
XS
SM
MD
LG