Link açıqlığı

Qırımtatar Milliy Meclisi akimiyetten yarımada vaziyetini al etmege talap ete


Bunı Meclisniñ matbuat kâtibi Lilâ Müslimova bildire.

Onıñ malümatına köre, 2014 senesi aprel 22-de Qırımtatar Milliy Meclisiniñ prezidiumı «Qırımda qanunsızlıq inkişafı aqqında» beyanatnı qabul etti. Vesiqağa binaen, Meclis akimiyet vekillerinden Qırımdaki vaziyetni al etüv usullarından faydalanmağa çağıra.

Meclis prezidiumınıñ qayd etkenine köre, Qırımda qanunsızlıqnıñ birinci ve esas sebebi «halq imayesi», yani «samooborona» ola. Onıñ içün Qırımtatar Milliy Meclisi «halq imayesini» acele sürette dağıtmağa talap ete.

Qırımtatar Milliy Meclisiniñ prezidiumı qayd ete ki, yarımada vaziyetini al etüv qırımtatarlar ve umumen Qırım cemiyeti içün pek müim.

Hatırlatamız, aprel 22-de qırımtatar halqınıñ lideri, Ukraina halq deputatı Mustafa Cemilev Qırımdan çıqar eken, belgisiz adamlar oña «Rusiye Federatsiyasına kelmek yasağı aqqında senetni» tuttırmağa tırıştılar. Oña köre, Mustafa Cemilev 5 yıl devamında Rusiyege kelmemek kerek.
XS
SM
MD
LG