Link açıqlığı

Ukraina Yuqarı Şurası «Vaqtınca işğal olunğan Ukraina toprağında vatandaşlarnıñ serbestlik ve aqqlarınıñ temini aqqında» Qanunnı qabul etti.

Mütenasip qanun lehasına zaruriy 226 deputattan 228 deputat qol tuttı, dep haber ete Radio Svoboda.

Vesiqa işğal etilgen territoriyalarnıñ statusını, mahsus uquqiy rejimni ve devlet organlarnıñ, müessiselerniñ ve teşkilâtlarnıñ faaliyet hususiyetlerni belgiley.

Mezkür qararğa binayen, Qırım Muhtar Cumhuriyeti ve Aqyar, olarnıñ üstündeki ava boşluğı, em de Ukraina territorial deñiz ve içki suvları vaqtınca işğal etilgen territoriya olaraq esaplana.

İnsan aqqları, milliy azlıqlar ve milletlerara munasebetleri boyunca parlament komitetiniñ reisi Valeriy Patskan bildirgenine köre, qanun leyhasınıñ azırlığı devamında oña 272 tüzetüv kirsetildi ve nazarğa alındı.

Bundan da ğayrı, qanun leyhasından «kollaboratsion faaliyet» aqqında 10-ncı madde çıqarıldı. Faqat, adliye nazirligniñ teklifi ile qoşma 12-nci madde kirsetildi.

«Biz vatandaşlarnıñ ileride Avropa mahkemelerine muracaat ete bilecegi içün uquqiy mehanizmni temin etemiz», – dedi Patskan.

Bundan da ğayrı, qanunda «işğal olunğan territoriyada ticaret faaliyetniñ devlet tarafından idare etüvi» de yazılğandır.

«Biz Qırım Muhtar Cumhuriyetinde ticaretni yasaq etmeymiz», – dedi deputat.

Qanun leyhasınıñ baquvı vaqtında deputatlar nevbetteki tüzetüvge de qol tuttı – oña binayen, Ukraina vatandaşları mütenasip vesiqanı kösterip, işğal olunğan territoriyadan maniasız çıqa ve kire bilecekler.

Deputatlar «diger memleketniñ vatandaşlığına mecburen qoşuluvı ukrain qanunlarında sayılmağanı»nı añlatqan tüzetüvni de alğışladı.

Qanunğa binayen, vaqtınca işğal olunğan territoriyada yaşağan vatandaşlarnıñ aqqlarını temin etmek içün Ukraina bütün olğan imkânlarnı qullanmalı.

Vaqtınca işğal olunğan topraqta insan aqqlarnıñ bozuluvı içün mesüliet işğalci devlet olğan Rusiyege tüşe.
XS
SM
MD
LG