Ukraina baş naziri Volodımır Ğroyman, ukrainlerni Devlet Bayrağı Kününen hayırlap, "işğal etilgen Qırımnıñ ve Donbassnıñ azat etilmesinden soñ, olarnıñ üzerinde Ukraina bayrağı kene yelpirecegine inanamız", dep ayttı.
"Mavı-sarı bayraq, vatandaşlarımıznıñ onlarnen nesilleri Ukraina mustaqilligi içün küreşniñ timsalidir. Mavı-sarı bayraq qaramaniy küreşniñ, sebatnıñ, ukrainlerniñ devlet qurucılığınıñ çeçekleridir. Onıñ içün, 1991 senesi Ukraina mustaqil olğanda, Ukraina Devlet Bayrağı tamam mavı-sarı olmaq kerekliginde kimseniñ sübesi olmadı", - denile Ukraina baş naziriniñ hayırlav nutqunda.
Avgustnıñ 23-ünde Ukrainada Devlet bayrağı Künü qutlaylar. Bu bayramnı 2004 senesi öz qararınen prezident Leonid Kuçma tayin etken edi, ondan soñ prezidentlik yapqan Viktor Yuşenko, 2009 senesinde, avgust 23-ünde Ukraina bayrağınıñ köterilmesi merasimini başladı.
Bayram arfesinde Ukraina prezidenti Volodımır Zelenskıy, avgust 23-ünde Devlet bayrağı kününde, mavı-sarıikrain bayrağını asıp, fleşmob keçirmege teklif etti.
Cuma künü Kyivde Sofiyskaya meydanında Ukraina prezidenti, Ukraina bayrağınıñ tantanalı köterilmesi merasiminde iştirak etecek.
Resmiy malümatqa köre, 1991 senesi avgust 23-ünde bir qaç halq mebusı Yuqarı Radanıñ Sessiya zalına mavı-sarı bayraqnı ketirdi. O bayraqnı papaz Petro Boyko taqdis etken edi. Tamam bu vaqiağa Leonid Kuçmanıñ "Ukraina Devlet Bayraq Künü aqqında" fermanı bağışlanğa, Ertesi künü, 1991 senesi avgust 24-ünde Ukraina öz mustaqilligini ilân etti.
Anayasağa köre, Ukraina devlet bayrağı — eki sarı ve mavı yatma sızıqlı sancaqtır.
