Qırımtatar resurs merkezi 2019 senesiniñ ilk üç ayı içinde Qırımda sağlıq hızmetleriniñ vaqtında kösterilüvinen bağlı insan aqları 32 kere bozulğanını qayd etti. Bu aqta mayısnıñ 7-nde teşkilâtnıñ bağ idarecisi Elvir Sagirman bu yılnıñ birinci üç ayında insan aqlarınıñ bozuluvı talillerini taqdim etip bildirdi.
«Çoqusı allarda azatlıqtan marum etüv yerlerinde kerekli tibbiy yardım kösterilmedi, neticede sağlıq vaziyeti fenalaştı. Bir çoq siyasiy mabüs mecburiy psihiatrik ekspertizağa oğratılğan edi», – dedi Sagirman.
32 adiseden 16-sı qırımtatarlarnen bağlıdır.
Qırımtatar faali Riza Asanov, «Veciye Kaşka davasınıñ» mabüsleri Asan Çapuh, Ruslan Trubaç, Bekir Degermenci, Kâzim Ametov, «ukrain diversantları davasınıñ» mabüsleri Vladimir Dudka, Andrey Zahtey, Yevğen Panov, vatandaş jurnalisti Nariman Memedeminov, Rusiye FSBsi tarafından zapt etilgen ukrainalı deñizciler, apiske alınğan ve mahküm etilgen Aleksandr Steşenko, Andrey Kolomiyets, Gennadiy Limeşko, Yevgeniy Karakaşev, Edem Bekirovnıñ aqları bozuldı.
Qırımtatar resurs merkezi Qırım ilhaqı başlağanından berli yarımadada 40 kişiniñ tutulmasını da rekord dep saydı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
