Qırımtatar resurs merkezi Qırım ilhaqı başlağanından berli yarımadada 40 kişiniñ tutulmasını rekord dep saydı. Bu aqta teşkilâtnıñ reisi Eskender Bariyev bu yılnıñ birinci üç ayında insan aqlarınıñ bozuluvı talillerini taqdim etip bildirdi, dep haber ete Qırım.Aqiqat mühbiri.
«İşğalci akimiyet yapqan qanunsız areketlerniñ büyük qısmı qırımtatar halqına qarşı ola», – dedi Bariyev.
Onıñ qayd etkenine köre, «qanunsız repressiv areketlerge» Rusiye tarafdarı blogerler, jurnalist ve faaller de oğrağan edi.
2019 senesiniñ ilk üç ayı devamında Qırımtatar resurs merkezi 45 tintüv, 52 tutuv, 61 sorğu, 97 apiske aluv, adaletli mahkeme aqqını 171 kere bozuv, siyasiy mabüslerniñ 32 etap etüvi ve «Qırım limanlarına qanunsız kirgen 60 gemini» qayd etti.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
