Öz-özüni ilân etken Abhazistan cumhuriyetiniñ prezidenti Raul Hacimba istifağa çıqmağa razı oldı, bunı "Eho Kavkaza" matbuatı haber ete.
Haber agentligi bildirgeni kibi, ariza imzalandı ve muhalefet vekillerine berildi.
Yanvarniñ 9-ında Abhazistanda yañı saylavlarnı talap etken kütleviy narazılıqlar başlandı. Bir qaç yüz miting iştirakçileri Suhuminiñ merkezinde toplandı, Abhazistan prezidenti memuriyeti binasınıñ qapısını bozıp açtı ve müessiseni ücüm etti.
Öz-özüni ilân etken cumhuriyetniñ akimiyeti narazılıq aktsiyasına ükümet devrimi ıntıluvı dedi. Hacimba tınçlıqnı saqlamaq nutqunen hitap etti ve fevqulâde vaziyetni ilân etmege azır olğanını bildirdi.
Öz-özüni ilân etken Abhazistan cumhuriyetiniñ parlamenti, prezident Raul Hacimbağa hitap etken qararnı qabul etti. Qararğa köre, akimiyet kergin içtimaiy ve siyasiy vaziyet sebebinden oña istifağa çıqmaqnı rica etti.
Abhazistan, Gürcistannıñ separatist bölgesi, 1993 senesinde Gürcistan ile cenkten soñ mustaqillikni ilân etti. Rusiye Abhazistandaki separatist keylerge daima qol tuta edi, 2008 senesinde ise beş künlik Gürcistan-Rusiye cenkinden soñ, Abhazistannıñ mustaqilligini tanıdı. Gürcistan, Abhazistan ve Cenübiy Osetiyanıñ topraqlarını Rusiye tarafından işğal etilgen, dep saya ve Rusiyeni topraq bütünliginiñ bozmasında qabaatlay.
