Qırımtatar Milliy Meclisiniñ reisi, Ukraina halq deputatı Refat Çubarovnıñ fikirince, bütün halqara teşkilâtlar iyünniñ 18-nde umumen 68 yıl sert rejimli koloniyada qalmalarına üküm etilgen qırımtatarlarnıñ ükmüne cevap bermek kerek.
«Rusiye mahkemesiniñ beş qırımtatarına bergen apis müddetlerine halqara teşkilâtlar cevap bermek kerek. Bunıñnen bağlı beyanatnı aydınlatqan ve bütün memleketlerni Rusiyege basqı quvetleştirmege çağırğan Ukraina Tış işler nazirligine teşekkürler bildirem», – dedi Çubarov Facebook saifesindeki video muracaatında.
Onıñ aytqanına köre, Ukraina «Rusiye istilâsı ile küreşte halqara toplulıqnı azırlamaq kerek».
«Rusiyeni toqtatmaq kerek, ve büyük rol Rusiye ile cenk vaziyetinde bulunğan Ukraina devletine berile. Rusiye istilâsına qarşı bütün memleketlerni, halqara toplulıqnı mobilizatsiya etüv teşebbüsleriniñ generatorı olmaq kerekmiz», – dep tüşüne Meclis reisi.
Rostov-na-Donudaki Şimaliy-Kavkaz okrugı arbiy mahkemesi Teymur Abdullayevni 17 yıl, Uzeir Abdullayevni 13 yıl, Rustem İsmailovnı 14 yıl, Ayder Saledinov ve Emil Cemadenovnı 12 yıl apishanede qalmasına üküm etti.
Rustem İsmailov, Uzeir Abdullayev ve Emil Cemadenovğa mahkeme qabaatlav tarafı istegeninden bir yıl çoq berdi. Qırımlılarnıñ imayesi mezkür qararnı şikâyet etecek ola.
Ukraina Tış işler nazirligi, Rusiye Şimaliy-Kavkaz okrugınıñ arbiy mahkemesiniñ Aqmescitteki birinci «Hizb ut-Tahrir davasınıñ» mabüslerine qarşı çıqarğan üküm sebebinden narazılıq bildirip, dünya toplulığını Rusiyege qarşı sanktsiyalarnı quvetleştirmesine çağırdı.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov veAyder Saledinov tevqif etilgen edi
Keçken sene dekabrniñ 6-nda belli oldı ki, Aqmescitteki birinci «Hizb ut-Tahrir davasınıñ» mabüsleri Rostov-na-Donu SİZOsına etap etildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
