Qırımtatar Milliy Meclisiniñ reisi Refat Çubarov dekabrniñ 12-nde saba Bükreş ava limanında Romaniya sıñırcıları tarafından üç saat tutulğanını bildirdi. O, «Rusiye mahsus hızmetleriniñ izini» köre.
«Rusiye mahsus hızmetleriniñ zeerli qarmalavuçları meni Romaniyada tutmağa tırışacaqlar, dep beklemedim. Bugün Bükreşke kelip, sıñır kontrolinden keçkende Romaniya sıñırcıları pasportımnı alıp, sebebini aytmadı ve 3,5 saat ava limanınıñ transfer alanında tuttı», – dep yazdı Çubarov Facebookta.
Onıñ aytqanına köre, Romaniya ziyaretiniñ sebebi cumaaqşamı kününe planlaştırılğan Tış işler nazirliginiñ Devlet kâtibi ve German Marshall Fund of the United States ekspertlerinen körüşüv ola. Anda Rusiye işğal etken Qırımdaki vaziyet ve yarımada ve Qara deñizniñ askeriyleştirilüvi muzakere etilecek.
Çubarovnıñ qayd etkenine köre, mezkür meselege Ukrainanıñ Romaniya elçisi ve konsulı kirişmege mecbur oldılar.
«Elbette, tutulğanımnıñ sebeplerini añlamaq içün malümat almaq maqsadınen Ukrainanıñ Romaniya elçihanesi Romaniya organlarına muracaat etecek», – dep yazdı o.
Ukraina ve Romaniya diplomatik müessiseleriniñ vekilleri bunı resmiy şekilde daa izaatlamadı.
2014 senesi iyülniñ 5-nde Çubarov Meclisniñ Herson vilâyetinde keçirilgen toplaşuvından yarımadağa qaytqanda Rusiye quvetçileri kirişini 5 yılğa yasaqlağan edi. Yarımadanıñ memuriy sıñırında Çubarovnı Qırımnıñ o vaqıt Rusiye prokurorı olğan Natalya Poklonskaya qarşıladı. O, «ekstremist faaliyetiniñ yasağına dair» tenbi oqudı, Rusiye sıñırcıları ise Meclis reisiniñ Rusiyege kirişi 5 yılğa yasaqlanğanını bildirdi.
2019 senesi iyülniñ 5-nde 5 yıllıq Qırımğa kiriş yasağı yekünlendi. Amma, Çubarovnıñ añlatqanına köre, o, alâ daa Qırımğa barıp olamay, çünki «Rusiye devletiniñ anayasa qurumı ve telükesizliginiñ esaslarına qarşı cinayet» içün ğıyabiy apis altında buluna.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
