Qırımtatar Milliy Meclisiniñ reisi Refat Çubarov emin ki, Qırımda Ukraina devlet bayrağı ve yanında qırımtatar milliy muhtariyetiniñ bayrağı olaraq qırımtatar bayrağı köterilecek. Bu aqta o, iyünniñ 26-nda Kyivde Ukraina Tış işler nazirliginiñ binası ögünde bayraqlarnı köterüv merasiminde çıqışta bulunıp ayttı.
«Qırımnıñ işğaline yol açqan ve onı ilhaq etüv ıntıluvı olğan Rusiye istilâsı sebebinden Ukraina ögünde olğan telükeler, bu istilâğa qarşı tirenüv çeşit milletten olğan ve farqlı dinlerni kütken Ukraina vatandaşlarını birleştire, Ukrainanıñ siyasiy milletini şekillendirmege yardım ete», – dedi Çubarov.
Onıñ qayd etkenine köre, «Ukraina devleti ve Ukraina cemiyeti tarafından qırımtatar milliy bayrağı şerefini qutlama Qırımnıñ tamır halqınıñ tarihına ürmetlerini köstere ve Qırımda yaşağan Ukraina vatandaşlarına Qırımda Ukraina devletiniñ suvereniteti ğayrıdan tiklenecegine işandıra».
«Bugünde-bugün qırımtatar milliy bayrağını bütün dünyada bileler. O, qırımtatarlar, Qırım ve Ukrainanı añdıra. Qırım üzerinde Ukraina devlet bayrağı köterilecek, yanında ise Ukraina terkibindeki qırımtatar milliy muhtariyetiniñ bayrağı olacaq, dep eminliknen bildirem», – dedi Çubarov.
Herson vilâyetiniñ akimiyeti iyünniñ 26-nda memuriyetiniñ binasında Ukraina bayrağınen beraber qırımtatar bayrağını köterip, işğal etilgen Qırımnıñ tamır halqına Ukraina olarnı unutmağanını kösterecek ola, dep bildirdi.
Ukraina prezidentiniñ ofisinde iyünniñ 26-nda qırımtatarlarnı milliy bayraq kününen tebriklep, Rusiye apsinde tutulğan faaller aqqında hatırlattılar.
Qırımtatar Milliy Meclisiniñ reisi Refat Çubarovnıñ bildirgenine köre, Ukraina Tış işler nazirligi dünya boyunca memleket elçihanelerine Qırımtatar bayraq kününde, iyünniñ 26-nda, Ukraina devlet bayrağınen beraber qırımtatarlarnıñ bayrağını kötermege vazife berdi.
Kyivde avtoyürüş ve aqşam üstü tantanalı yürüş ve büyük qırımtatar bayrağınıñ çıqarıluvı planlaştırıla.
Qırımtatar resurs merkeziniñ reberi Eskender Bariyevniñ qayd etkenine köre, Kreml kontrolindeki Qırım akimiyeti qırımtatar faallerine qarşı çift standartlarnı qullana. Böylece, iyünniñ 26-nda Qırımtatar bayraq künü munasebetinen aktsiyalarnıñ keçirilüvine keder etmege tırışa.
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök bayraqtır. Tantanalı tedbirler em Qırımda, em esas Ukrainada, em çetele ötkerile.
