Qırımtatar Milliy Meclisiniñ reisi Refat Çubarov Qırım ve Aqyardaki Rusiye Tahqiqat komitetinden qabaatlav vesiqalarını aldı.
«Üç vesiqa azırlanğan künleriniñ qıyaslanması, em de Rusiye cezalayıcılarınıñ olarnı eñ qısqa vaqıtta çeşit yollarnen ve tek yekâne qanuniy usulı olğan – Ukraina Baş prokuraturasınen bağlanması kerek Rusiye Baş prokuraturasından bermeyip yollamaq ıntıluvları Rusiye işğalci tahqiqatınıñ Rusiye tarafından vaqtınca işğal etilgen Qırımda yaşağan (menim daa evel yaşağanım) Ukraina vatandaşlarına qarşı yapqanlarınıñ cinayet olğanını yahşı añlağanını isbatlay», – dep yazdı Çubarov Facebookta.
Onıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Bu sene mart ayınıñ soñunda Rusiye Tahqiqat komiteti Qırımtatar Milliy Meclisiniñ reisi Refat Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212 maddesiniñ 1-inci qısmı (qalabalıqlarnı teşkil etüv), 280.1 maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq faaliyetke açıq çağıruv) açıldı.
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Aktsiya mayısnıñ 3-nde keçirilecek edi. Koronavirus pandemiyası sebebinden yürüş başqa vaqıtqa qaldırıldı.
