Advokat Nikolay Polozov, Rusiye tahqiqatçısınıñ işğal etilgen Qırımda Qırımtatar Milliy Meclisiniñ reisi Refat Çubarovğa qarşı açılğan davada onı imayesinden çetleştirmek niyeti aqqında haber ete.
Bu aqta Polozov Facebookta yazdı.
«Tünevin alğan malümatıma köre, bu davanen oğraşqan (Mustafa Cemilevniñ davasını da baqa) tahqiqatçı Magomed Magomedov menim davada imayeci olaraq iştirak etmeme izin bermedi. Tahqiqatçı advokatnı, yani meni, davada iştirak etmekten çetleştirmege qarar aldı», – dep bildirdi Polozov.
Onıñ malümatına köre, tahqiqatçı Polozovnıñ daa evel «fevral 26 davasında» Ahtem Çiygoznı imaye etkenine esaslandı. Tahqiqatçı Refat Çubarovnı «fevral 26 davasınıñ» iştirakçilerinden biri dep saya. Tahqiqatnıñ fikirince, advokatnıñ eki müvekkili arasında «zıddiyet ola bile», Polozov davada iştirak etemez.
«Advokat davada birden çoq iştirakçini imaye etse de, zıddiyet olmağanda çetleştirilemez, bu tek tahqiqatçınıñ hayalı ola bile. Bizde de aynısı oldı», – dep qayd etti advokat.
Onıñ bildirgenine köre, tahqiqatçınıñ bu qararlarını endi temyiz etti.
«Tahqiqatçınıñ davada imayeci olaraq iştirak etmeme izin bermemek, em de advokatnı çetleştirmek qanunsız qararlarını Aqmescitniñ Kiyev rayon mahkemesinde Ceza usuliy kodeksiniñ 125 maddesine köre temyiz ettim. Oturışuv kününiñ belgilenmesini bekleymiz ve qadılar Tahqiqat komitetiniñ bu yapqanlarına ne aytar baqarmız», – dep qoştı advokat.
Tahqiqatçı Polozovnıñ malümatını izaatlamadı.
Martnıñ 31-nde Rusiye Tahqiqat komiteti Qırımtatar Milliy Meclisiniñ reisi Refat Çubarovnı ğıyabiy şekilde qabaatladı.
Tahqiqat komiteti, Çubarovnı 2015 senesi baarde Ukraina telekanallarından biriniñ yayınında «Rusiye menfaatlarına qarşı ekstremist faaliyetine» ve Qırımnıñ işğalden qurtarıluvına çağırğanında qabaatladı.
«Şimdi meni qalabalıqlarnıñ teşkil etilüvinde qabaatlaycaq olalar. Bu maddege köre 8 yıldan 15 yılğa qadar apis cezası berile. Añlaşıla ki, bu «Dünya – zorbalıq ve işğalge qarşı. Menlik yürüşi» barışıq, zorbalıqsız aktsiya planlarımızğa bir cevap oldı», – dep izaatladı davanı Meclis reisi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
2014 senesi fevralniñ 26-nda Qırım parlamentiniñ binası ögünde Ukraina topraq bütünliginiñ tarafdarları ve duşmanlarınıñ büyük mitingi olıp keçti. Qırımtatar ve Ukraina tarafdarı faallerine qarşı Rusiye tarafdarı faaller çıqtı.
2015 senesi yanvar ayında Rusiye Tahqiqat komitetiniñ Qırım idaresi fevralniñ 26-nda mitingde olğan qalabalıqlar aqqında cinaiy dava açtı.
Ukraina topraq bütünligine qoltutqanlar tutuldı: Qırımtatar Milliy Meclisiniñ reis muavini Ahtem Çiygoz, faaller Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyev.
Daa soñra mahkeme «fevral 26 davasını» ekige böldi: o vaqıt Qırımda Meclis lideriniñ rolüni alğan baş şübheli Ahtem Çiygoz ayrı esnasqa alındı.
Advokat Cemil Temişevniñ teşebbüsinen faal Talât Yunusov ve ATR telekanalınıñ operatorı Eskender Nebiyev tahqiqatnen işbirligi yapıp, olarnıñ ifadeleri «fevral 26 davası» diger mabüsleriniñ davalarında delil olmaycaq şartınen qabaatlarını tanıdı. 2015 senesi dekabr ayında Talât Yunusov 3,5 yılğa, Eskender Nebiyev eki yılğa şartlı olaraq üküm etildi.
2017 senesi sentâbrniñ 11-nde Rusiye mahkemesi yarımadanıñ Rusiye işğalinen bağlı narazılıqlarnı «qalabalıqlar» dep adlandırıp, Çiygoznı olarnı teşkil etkeninde qabaatladı ve sekiz yıl sert rejimli koloniyada qalmasına üküm etti. 2017 senesi oktâbrniñ 25-nde Rusiye akimiyeti Qırımda mahküm etilgen Ahtem Çiygoznı azat etip, onı Türkiyege teslim etti. Daa soñra o, Kyivge keldi.
2018 senesi iyünniñ 19-nda Kreml kontrolindeki Aqmescitniñ Merkeziy rayon mahkemesi «fevral 26 davasınıñ» mabüslerine şartlı apis cezalarını berdi. Ali Asanov ve Mustafa Degermenci 4 yıl ve 6 ay, Arsen Yunusov ve Eskender Kantemirov 4 yıl, Eskender Emirvaliyev 3 yıl ve 6 ayğa şartlı olaraq üküm etildi, er birine 3 yıl sınav müddeti berildi.
2020 senesi fevralniñ 4-nde sınav müddeti bitmegen «fevral 26 davasınıñ» mabüsi Mustafa Degermencige qarşı cinaiy mahkümiyetniñ lâğu etilgeni belli oldı.
