Qırımtatar Milliy Meclisi reisi Refat Çubarov Qırım Nazirler Şurasınıñ reis muavini Georgiy Muradovnıñ «Qırım platforması» iştirakçilerini «ağırtıcı aqibetler» beklegeni aqqında bildirmesini «tehdit ve ultimatum» adlandırdı. Bunı o, Qırım.Aqiqatqa ayttı.
«Rusiyeniñ ştajı muvafaqiyetsiz oldı ve «Qırım platforması»nıñ çoq sayıda iştirakçisi kelecegini tasdıqladı. Şimdi ise tehditler başlandı. Bu endi şantaj degil, bu ultimatum. Avgustnıñ 23-ne yaqın, bellesem, Rusiyeniñ vazifedar şahışları sıfatında ağır artilleriya qallanılıp başlanacaq», – dedi o.
Bundan ğayrı, Çubarov Muradovnıñ «Qırım platforması» «Rusiye Federatsiyasınıñ topraq bütünligini şübe altına atacağı» aqqında sözlerine itiraz etti.
«Muradovnıñ tehdidi saçmadır, çünki Rusiyeniñ Qırımğa dair topraq bütünligini şübe altına iç kimse atmaycaq – medeniy dünyada Qırımnı qanunsız ilhaq etme ıntıluvını kimse tanımay», – dep qayd etti Çubarov.
Evel, Kremlniñ nezareti astında olğan Qırım Nazirler Şurasınıñ reis muavini, Qırımnıñ Rusiye prezidenti yanında daimiy temsilcisi Georgiy Muradov, «Qırım platforması» iştirakçilerini «ağırtıcı aqibetler» bekley, dep bildirdi.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
