Qırımda faallerniñ hırsızlavları ve taqibatınıñ yekâne maqsadı - Rusiye akimetiniñ siyaseti ile razılaşmağanlarnı işğal etilgen yarımadanı terk etmege mecbur etmektir. Bu fikri qırımtatar Milliy Meclisiniñ reisi Refat Çubarov avgust 30-ında Dünya ğayıp olğan insanlar künü bağışlanğan aktsiyada Qırım.Aqiqat mühbirine söyledi.
"Qırımda şimdi olğan er şey yalıñız halqnı bastırmaq içün degil, amma işğal ile razılaşmağan adamlarnı Qırımnı terk etmege mecbur etmek içün yapıla. Yaqında Rusiye vatandaşlarınıñ işğal altındaki Qırımğa köçürilmesi aqqında mustaqil ekspertlerniñ esabatını kördim. Ve bu malümatqa köre, artıq 800 biñden bir millionğa qadar adam Qırımğa köçürilgen sayılır. Qırımnı müstemleke etmek içün, Qırımnı Rusiyeniñ terkibinde qaldırmaq içün, olar Qırımğa adamlarnı köçüre ve tamır halqnı - qırımtatarlarnı, etnik ukrainlerni ve işğalnen razı olmağan er kesni sıqıştırmaq içün er sey yapalar", - dedi Refat Çubarov.
Bir yıl evel Qırımtatar Milliy Meclisiniñ reisi Refat Çubarov demokratik memleketlerniñ liderlerini Rusiyeni «terror devleti» olaraq tanımalarına çağırdı.
2019 senesi mart ayında ABD Ukraina elçihanesi Rusiyeni ilhaq etilgen Qırımda diger siyasiy baqışlarnı bastırmaq içün yapqan «işkence ve insan hırsızlavlarını» toqtatmasına çağırğan edi.
Qırım ilhaqından soñ yarımadada insanlar, hususan qırımtatarlar, sıq-sıq qaçırılmağa başladı. Rusiye Taqiqat komitetiniñ Qırım idaresi, «yarımadada qırımtatarlarnıñ kütleviy ğayıp olması» qayd etilmey, dep israr ete.
Faallerniñ malümatına köre, Rusiyeniñ Qırım işğalinden soñ 44 qırımlı ğayıp oldı, 15 kişi alâ daa tapılmadı.
