Qırımtatar Milliy Meclisiniñ reisi Refat Çubarov demokratik memleketlerniñ liderlerini Rusiyeni «terror devleti» olaraq tanımalarına çağıra. Bu aqta o, Dünya ğayıp olğan insanlar künü qayd etilgen avgustnıñ 30-nda Facebookta bildirdi.
«Elbet, bilemiz ki, kerçek ayatta insanlarnıñ izsiz ğayıp oluvınıñ bir sıra sebebi bar, amma bizler ilk evelâ Rusiye tarafından vaqtınca işğal etilgen Qırımda hırsızlanğan ve ğayıp olğan insanlar aqqında aytamız. Demokratik devletlerniñ liderleri cesür olıp, bütün dünyada, hususan işğal etken Ukraina topraqlarında insanlarnı hırsızlağan Rusiyeni terror devleti olaraq açıq sürette tanımalı», – dep yazdı Çubarov.
2019 senesi mart ayında ABD Ukraina elçihanesi Rusiyeni ilhaq etilgen Qırımda diger siyasiy baqışlarnı bastırmaq içün yapqan «işkence ve insan hırsızlavlarını» toqtatmasına çağırğan edi.
Qırım ilhaqından soñ yarımadada insanlar, hususan qırımtatarlar, sıq-sıq qaçırılmağa başladı. Rusiye Taqiqat komitetiniñ Qırım idaresi, «yarımadada qırımtatarlarnıñ kütleviy ğayıp olması» qayd etilmey, dep israr ete.
Faallerniñ malümatına köre, Rusiyeniñ Qırım işğalinden soñ 44 qırımlı ğayıp oldı, 15 kişi alâ daa tapılmadı.
