Qırımtatar Milliy Meclisiniñ reisi Refat Çubarov Qırımğa qarşılıq Donbas vaziyetiniñ çezilmesi qabul etilemez, dep tüşüne. O, «Halq hızmetçisi» fraktsiyasınıñ reisi David Arahamiyanıñ «Prâmıy» ukrain telekanalınıñ yayınında Donbastan askerler ketsin dep, işğal etilgen Qırımğa suv berir edi dep aytqanını tenqit etti.
«Arahamiyalar toprağımıznı satacaq! Devlette birileri bütün halq – qırımtatarlarnı, ukrainlerni teslim etecek ola, anda 500 biñ insan bar. Devletimizniñ suv içün, Donbas içün bizni satmasına izin bermemelimiz», – dedi Çubarov UA:Krım telekanalında.
Arahamiya işğal etilgen Qırımğa suv berilmesi aqqında aytıp, bu onıñ «Halq hızmetçisiniñ» reisi olaraq degil, şahsiy fikri olğanını qayd etti.
Daa evel Ukraina Yuqarı Radasınıñ bücet komitetiniñ yolbaşçısı Yuriy Aristov Rusiye işğal etilgen Qırımğa suv satmaq ğayesi aqqında Azatlıq Radiosınıñ leyhası olğan «Shemı» mühbirine (video 2019 senesi oktâbrniñ 17-nde çıqarıldı – QA) izaat berip ayttı.
Daa soñra Aristov Qırım.Aqiqatqa izaat berip, bu tek ğaye edi, dep bildirdi. Bu mesele artıq muzakere etilmey, dep işandıra.
Ukraina prezidentiniñ Qırım Muhtar Cumhuriyetindeki daimiy vekili Anton Korınevıç, yarımada işğalden qurtarılğanına qadar Şimaliy-Qırım kanalından Qırımnıñ suv teminlevi imkânsız ola, dep işandıra.
Fevralniñ 5-nde Moskva kontrolindeki Qırımnıñ suv hocalığı ve melioratsiya devlet komitetiniñ yolbaşçısı İgor Vaylniñ bildirgenine köre, Aqmescitte içme suvu eñ çoq 90-100 künge yeter.
Bundan soñ Qırım ükümetiniñ Rusiye yolbaşçısı Yuriy Gotsanükniñ aytqanına köre, Aqmescitte suv berilmesini sıñırlamağa acet yoq.
Ukraina akimiyeti işğal etilgen Qırımnıñ suvnen teminlevi tek yarımada işğalden qurtarılğan soñ yañıdan başlatılacaq, dep çoq bildirgen edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
