Küzde işğal etilgen Qırımğa suv satmaq ğayesi aqqında aytqan Ukraina Yuqarı Radası bücet komitetiniñ yolbaşçısı Yuriy Aristov bu mesele artıq muzakere etilmey, dep bildire. Bu aqta o, Qırım.Aqiqatqa tarif etti.
«Siyasetçi ya da bücet komiteti olaraq menba qıdırsaq, imkânlarnı qıdıramız (bücetni tolduruv imkânlarını – QA), bu tek imkânlarnı qıdıruv edi, bir areketnen alâqası yoq edi. Bir esap, bir şey yoq edi, tek ğaye bar edi. Şimdi bu mesele artıq muzakere etilmey», – dep işandırdı o.
Tafsilâtlıca «Qırım.Aqiqat» teleleyhasında seyir etiñiz.
Daa evel Ukraina Yuqarı Radasınıñ bücet komitetiniñ yolbaşçısı Yuriy Aristov Rusiye işğal etilgen Qırımğa suv satmaq ğayesi aqqında Azatlıq Radiosınıñ leyhası olğan «Shemı» mühbirine (video 2019 senesi oktâbrniñ 17-nde çıqarıldı – QA) izaat berip ayttı.
Rusiye Devlet Dumasınıñ Qırım deputatı Mihail Şeremet, Rusiye tarafı Dnipro suvınıñ esas Ukrainadan işğal etilgen Qırımğa satuv ğayesine «tek qoltutacaq», dep ayttı.
Aqmescit memuriyetiniñ Rusiye yolbaşçısı Yelena Protsenko, suvnı tutumlı qullanmaq içün aqmescitlilerge sıcaq suv tek raatlıq künleri berilecek, dep vade etti.
Bu afta Rusiye kontrolindeki Qırım ükümetiniñ yolbaşçısı Yuriy Gotsanükniñ bildirgenine köre, «Voda Krıma» müessisesinde toplaşuv ötkerildi, anda qırımlılarnı içme suvınen teminlev ve suv teminlev hatlarında onı coymamaq içün qullanılacaq usulları muzakere etildi.
Ukraina prezidentiniñ Qırım Muhtar Cumhuriyetindeki daimiy vekili Anton Korınevıç, yarımada işğalden qurtarılğanına qadar Şimaliy-Qırım kanalından Qırımnıñ suv teminlevi imkânsız ola, dep işandıra.
Ukraina akimiyeti işğal etilgen Qırımnıñ suvnen teminlevi tek yarımada işğalden qurtarılğan soñ yañıdan başlatılacaq, dep çoq bildirgen edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
