Qırımtatar Milliy Meclisiniñ reisi Refat Çubarov, halqara teşkilâtlarnıñ azalarını ve çetel diplomatlarını işğal etilgen Qırım yürüşinde iştirak etmelerine davet etecek, dep haber etti. Bu aqta o, bazar künü, yanvarniñ 26-nda, video muracaatında bildirdi.
«Bu BM insan aqları monitoring missiyası. OSCE Ukraina missiyasınıñ yolbaşçıları ve azalarını da davet etecekmiz. Bundan ğayrı, Rusiye temsil etilgen halqara teşkilâtlarnıñ vekillerini de bu aktsiyağa davet etmege isteymiz. BM, PACE ve digerlerini. Birleşsek, dünyanıñ yüzüni bu problemge aylandırıp olurmız. Qırım, Rusiye akimiyetleri bundan qorqa», – dep ayttı o.
Meclis reisiniñ aytqanına köre, «Qırım yürüşi» aktsiyası zorbalıqsız olacaq.
Ukraina Devlet sıñır hızmetiniñ bildirgenine köre, keçirilüvi mayısnıñ 2-ne ilân etilgen Qırım yürüşiniñ iştirakçilerine mania olmaq içün sebep yoq.
Refat Çubarovnıñ aytqanına köre, mayısnıñ 2-ne ilân etilgen Qırım yürüşini keçirmek içün Ukraina akimiyetiniñ razılığını almağa kerek yoq, çünki bu aktsiya qanunğa uyğun ola. Ukraina akimiyeti Meclis reberliginiñ planlarına açıq şekilde daa cevap bermedi.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Refat Çubarovnıñ aytqanına köre, yürüş teşkilâtçıları yapqan areketlerini Ukraina akimiyetinen keliştirmege «tırışacaq».
Yanvarniñ 22-nde Çubarov Qırım yürüşi mayısnıñ 2-nde keçirilecek, dep ayttı. Meclis reisi, işğal altındaki yarımadağa küç qullanıp kireceklerini de inkâr etmey.
Rusiye kontrolindeki Qırım yolbaşçısı Sergey Aksenov ilân etilgen yürüşni provokatsiya dep adlandırıp, «sert qarşılıq kösterilecegini» vade etti.
