Qırımtatar Milliy Meclisiniñ reisi Refat Çubarov 1944 senesi qırımtatar sürgünligini Rusiyeniñ Qırım ilhaqınen qıyasladı. Böyle bir fikirni o, mayısnıñ 17-nde Kyivde qırımtatar sürgünligi aqqında ikâye etken «1944» vesiqalı filminiñ premyerasında bildirdi, dep haber ete Qırım.Aqiqat mühbiri.
«75 yıl… Bu aqşam, mayısnıñ 17-nde, bir çoq insan yuqlamağa ketkende saba olarnıñ qapuları tek qaqılmaycaq, çızmalarnen çıqarılacağını ve mayısnıñ 18-i başlaycağını bilmey edi. O insanlarnıñ ne is etkenlerini tasavvur etmege rica etem. Az evel (mayısnıñ 17-nde aqşam – QA) Nariman Celâlnıñ mesacını kördim, yarın bir şey yapmasınlar dep, oña da bir çoq qırımtatarına kibi ihtar berildi… Böylece 1944 senesi qırımtatarlar içün, ne yazıq ki, 2014 senesi tekrarlandı ve 2019 senesi devam ete», – dedi Çubarov.
Kyivdeki «D12» galereyasında mayısnıñ 17-nde qırımtatar sürgünligi aqqında ikâye etken «1944» vesiqalı filminiñ premyerası olıp keçti. Onıñ rejissörları Yunus Paşa ve Qırım.Aqiqat müellifi Fatima Osman oldılar.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
