Qırım.Aqiqat Qırımda apiske alınğan ve aq qorçalayıcı teşkilâtlar tarafından Kremlniñ siyasiy mabüsi olaraq tanılğan qırımtatar faali, siyasetçi ve jurnalist Nariman Celâlnıñ tezkerelerini yayınlay.
Martnıñ 1-nde kamerada yarım yıl beraber olğanım qomşum Sergey ev apsine yiberildi. Ve men eki afta bir özüm edim.
Martnıñ 14-nde "Qırım baariniñ qaramanı", "rus opolçen", Keriç şeer şurasınıñ sabıq mebusı Konstantin Yermanov qomşum oldı. Onıñ sözlerine köre, Qırımda Keriç memuriyeti üzerine Rusiye bayrağını asqan birinci adam o olğan eken.
Şimdi ise Sergey Aksönovnı aqaretlegeni içün 128 maddege ve kendir tarqatqanı içün 228 maddege binaen tevqif etildi. O özüne muhalefetçi dey.
Bizni, eki mefküreviy raqipni - tesadüfiy ya da aselet beraber oturtılarmı, bilmeyim.
Farqlı şeyler aqqında laf ettik. Bir kimse bunı beklegen olsa, qavğa etmedik. Men onı bir şeyge inandırmaqnıñ manasını körmedim. Yalıñız Robespyerniñ, inqilâp öz balalarını aşağanı aqqında sözlerini hatırlattım.
Martnıñ 17-nde onı başqa yerge avuştırdılar, men oturğanım kamerağa ise Maksim Lisükni oturttılar. O Kahovkadan "zenaatdaşım".
Maksim çoqtan berli Aqyarda yaşay. Ticaret ile oğraşa ve namuslı adam olaraq qalmağa tırışa. Eki ay evel qızı doğdı. O menim yaşdaşım.
Yaqınlarınıñ yaşağan Ukrayinada Rusiye akimiyetiniñ areketlerini körgen o, dayanıp olamadı ve "VKontakte" içtimaiy ağındaki yazınıñ altında arbiy areketlerge qarşı fikrini ve Rusiye prezidenti aqqında keskin sözler yazdı.
Bir qaç künden soñ tintüv vaqtında evinde trotil şaşkasını taptılar, Rusiye haber vastaları ise keskin tarzda yañı ukrainalı "diversant" aqqında yazıp başladılar.
Maksim pek aqıl-fikirnen iş körgen ve tınç, memleketini - Ukrayinanı sevgen adam. Ve vatandaşlığına baqmadan insanlarnıñ öldürilmesine qarşı fikirlerini bildire.
O, Qırımda böyle bir adam degil. Amma çoqusı öz noqta-i nazarını bildirmege cesaret etalmay.
Qırımtatar faali, siyasetçi ve jurnalist Nariman Celâlnıñ beyanatını Advokat Nikolay Polozov Facebook saifesinde yayınladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.