Ukraina halq deputatı, Qırımtatar Milliy Meclisiniñ reis muavini Ahtem Çiygoznıñ fikirince, işğal etilgen Qırım sakinleri yarımadada koronavirus yuqunçınıñ tarqaluv telükesi ne qadar ciddiy olğanını añlamay. O, bunı Rusiye akimiyetiniñ aytqanları ve bu vaziyetke olğan munasebetinen bağlay.
«Qırımlılarğa malümat bermege tırışamız. Ğaliba, belli telüke alanında daimiy bulunuv ve Rusiye propagandası olarnıñ lâqaytlığını doğurdı. Qıtada ciddiy problemler olğanını, sert tedbir alınğanını, cemaat özüni tertiplegenini bile, amma qırımlılar bu yarımadağa kelmeycek, dep tüşüneler. Lâqaytlıq ölümnen bir olğanına işandırmağa ve areketke çağırmağa qala, bu vaziyette biz olarğa mında yardım etip olamamız», – dedi Çiygoz Qırım.Aqiqat Radiosınıñ yayınında.
Onıñ aytqanına köre, Ukraina tarafı qırımlılarğa belli sıñırlav tedbirleri kerek olğanını añlatmağa tırışa.
«Ukraina devleti, keç olsa da, tedbirlerni tezleştirmeli ve yardım yollarını qıdırmalı. Qırımlılarğa toy, doğğan künleri, aqşamları qave ve restoranlarda bulunmaqtan vazgeçmek kerek olğanını añlatmağa tırışamız, amma yetip olamaymız. Bu yaramay bir şey», – dep qayd etti Çiygoz.
Daa evel Çiygoz qırımlılarnı özüni tecrit etip, qorçalanmağanlarğa qoltutmalarına çağırğan edi. Onıñ qayd etkenine köre, Ukrainada qırımlılarğa yardım etüv imkânları qıdırılacaq ve pandemiya tarqaluvına qarşı nasıl tedbir ve usullar qullanıla bile bildirilecek.
Martnıñ 24-nde Rospotrebnadzornıñ Qırım idaresi bildirgenine köre, işğal etilgen Qırımda ve Aqyarda yañı koronavirus hastaları qayd etilmedi.
Qırımnıñ Rusiye akimiyeti ilk COVID-19 hastası bar dep tasdıqladı. Yarımada akimiyeti birinci hastanen alâqada olğan 37 insannı taptı. Olar tibbiy müessiselerde ya da evlerinde tecrit etildi.
Rospotrebnadzor malümatına köre, koronavirusnen hastalanğan qırımlı Qırım ve Herson vilâyetiniñ memuriy sıñırındaki Rusiye keçiş noqtasından keçkende Frenkistanğa barğanını gizledi.
Qırım Muhtar Cumhuriyetiniñ Prokuraturası, Qırımnı işğal etken Rusiye yarımadada koronavirus yuqunçınıñ tarqaluvından mesüliyetli ola, dep bildire.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
