Kyivde yaşağan Kremlniñ eski siyasiy mabüsi, qırımlı Volodımır Baluh «ayrı zalımlıqnen köteklendi», dep tüşüne Ukraina Yuqarı Radasınıñ deputatı, Qırımtatar Milliy Meclisiniñ reis muavini Ahtem Çiygoz.
«Gidropark» civarlarında oldı, gece. Bilgeniñiz kibi, tünevin siyasiy mabüslerimizniñ azat oluv yıllığı edi. Körüşip oturğanlar, laf etkenler, yarı gecege yaqın dağılıp başladılar. Onı Ukrainağa qol tutqanı içün köteklegenlerinden başqa bir fikrim yoq, çünki urbası da pek renkli edi, kazak resimi bar. Amma tahqiqat bunı çezecek. Qolu ve köpürçik kemigi sındırıldı. Saba tapılğanda essiz edi, yani onı ayrı bir zalımlıqnen köteklediler. O da zayıf biri degil. Bir qaç adam olğanı añlaşıla», – dedi Çiygoz Qırım.Aqiqatqa.
Kyivniñ Milliy politsiyası, Baluh nasıl köteklendi ögrene, dep qayd etti. Ukraina prezidentiniñ ofisi qırımlığa yapılğan ücüm sebebinden qasevetlengenini bildirdi. Baluh köteklengenini Oleg Sentsov haber etti. Onıñ malümatına köre, faal sentâbrniñ 7-nden 8-ne keçer gecesi köteklendi. Ağır alda hastahanege alındı – qolu ve köpürçik kemigi sındırıldı. Qırım.Aqiqat, Baluhnıñ nomerasına telefon etti, amma qadın cevap berdi. O, Sentsovnıñ malümatını tasdıqladı, amma özüni tanıtmadı.
İyünniñ 12-nde Kyivde faal Serğiy Sternenkonıñ sıñırlav tedbiri belgilengen mahkeme vaqtında politsiya hadimleri Volodımır Baluhqa qarşı küç qullandı.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
