Kyivde yaşağan Kremlniñ eski siyasiy mabüsi, qırımlı Volodımır Baluhnı sentâbrniñ 7-nden 8-ne keçer gecesi köteklediler. O, ağır alda hastahanege alındı. Bu aqta qırımlı ukrainalı rejisser Oleg Sentsov Facebook saifesinde bildirdi.
«Volodımır Baluh bugün gece köteklendi. Onı tek saba tapqanlar. Şimdi hastahanede. Alı ağır. Tafsilâtlı malümat ögrenile. Volodâ özüne keldi. Qolu ve köpürçik kemigi sındırıldı. Ayat telükesi yoq», – dedi Sentsov.
Qırım.Aqiqat, Baluhnıñ nomerasına telefon etti, amma qadın cevap berdi. O, Sentsovnıñ malümatını tasdıqladı, amma özüni tanıtmadı.
«Ebet, (Baluhnıñ köteklenmesi ve hastahanege alınması – QA) doğrudır. Adiseniñ tafsilâtları daa belli degil», – dedi Qırım.Aqiqatqa subetçi.
Qırım.Aqiqat tafsilâtlı malümat almağa tırışa.
İyünniñ 12-nde Kyivde faal Serğiy Sternenkonıñ sıñırlav tedbiri belgilengen mahkeme vaqtında politsiya hadimleri Volodımır Baluhqa qarşı küç qullandı.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
