Qırımtatar Milliy Meclisi reisiniñ müavini, Ukraina halq mebusı Ahtem Çiygöz, ne Ukraina prezidentiniñ ofisi, ne de prezidenti Volodımır Zelenskıynıñ özü qırımtatarlarnıñ boşatıluvını Meclisnen muzakere etmegenini qayd etti.
Bunı o Qırım.Aqiqat Radiosınıñ efirind aytıp berdi.
"Yazıq ki, diaologımız olmadı. Amma tünevin (dekabrniñ 29-ında - QA) biz baş nazir Aleksey Gonçaruknen körüştik, qonuştıq, amma, yazıq ki, baş nazirniñ, bizim kibi, deñişüvge alâqası yoq. Biz sadece o oğraşqan meselelerni muzakere ettik. Körüşümiz bir saattan çoq oldı ve mence, onıñ birinci körüşüv olğanını közden tutsañ, yahşı keçti", - aytıp berdi Çiygöz.
Daa evel Ukraina prezidentiniñ Ofisi Qırım esirleriniñ Rusiye türmelerinden azat etilüvini muzakere etmek içün qırımtatarlarnıñ timsaliy organına muracaat etmegenini Qırımtatar Milliy Meclisiniñ reisi Refat Çubarov ayta edi.
Zelenskıy qırımtatar Meclisiniñ vekilleriniñ qaydlarına öyle de cevaplanmadı.
Dekabrniñ 29-ında soñki deñişimden soñ Ahtem Çiygöz, ilhaq etilgen Qırımda ve Rusiyede tutulğan qırımtatarlarnı azat etmek içün Rusiuye prezidenti Vladimir Putinge basqı ziyadece olmaq kerek, dep qayd etti.
İşğal etilgen Ğorlivka yanındaki sıñırda «Mayorske» keçiş noqtasında dekabrniñ 29-nda tutulğan şahıslar deñiştirildi.
Dekabrde Parijde «normand formatı» sammiti keçirildi – Frenkistan, Almaniya, Ukraina ve Rusiye liderleri körüşti. Taraflar, Kyiv ve Moskva «er kesni er keske» formulası boyunca şahıslarnı dekabrniñ 31-ne qadar deñişecek, dep añlaşqan edi.
Ukraina prezidenti Volodımır Zelenskıy tutulğan şahıslarnı deñişim dekabrniñ 29-nda olacaq, dep tasdıqladı.
