Rusiye ordusı mayısnıñ 12-ne keçer gecesi Çerniğiv vilâyetindeki Novğorod-Severskiy şeerine avadan darbe endirdi, elâk olğan ve yaralanğan insanlar bar. Bu aqta vilâyetniñ arbiy memuriyet yolbaşçısı Vâçeslav Çaus mayısnıñ 12-nde saba bildirdi.
Onıñ aytqanına köre, darbeler kritik infrastruktura obyektlerine – mekteplerge endirildi.
«Diger idariy bina ve şahsiy evler de zarar kördi. Yaralanğan ve can bergen insanlar bar. Adise yerinde qurtarıcılar ve tibbiyet hadimleri çalışa», – dep yazdı Çaus Telegramda.
Başqa tafsilâtlar berilmedi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
