KIYİV – Rusiye-Ukrayina cenki Qırımnıñ azat etilmesi ile bitmek kerek. Bunı OrduInform-ğa intervyü berir eken Ukrayina Mudafaa nazirliginiñ Baş istihbarat idaresiniñ temsilcisi Andriy Çernâk dedi. Ukrayina Mudafaa nazirliginiñ Bİİ böyle fırsat daa olğance işğal etilgen Qırımnı terk etmege tevsiye ete, dep qayd etti o.
"Elbette duşmannıñ Qırım ile bağı kesilmelidir. Rusiyeniñ vaqtınca işğal etilgen Qırımnı öz arbiy maqsatları içün qullanmasına izin bermemelimiz, ahır-soñu Qırım içün sözde "eyi niyet işaretini" kerçekleştirmege mecber etmelimiz. Bu maqsatqa irişmemiz adeletli sulhnıñ anahtarı ola bilir", - dep qayd etti Andriy Çernâk.
Andriy Çernâk, "Rusiye 2014 senesi Qırımnıñ işğali ve onıñ büyük arbiy bazağa çevirilmesi ile Ukrayinağa qarşı cenkni başlağanını" hatırlattı.
Onıñ sözlerine köre, Ukrayina Qırım yönelişinde de muvafıq çareler körmekni toqtatmay, bunı hususan yarımadada yüz bergen adiseler köstere: "Keriçten Rusiyege qanunsız qurulğan köpürde kilometrlik tıqanıqlıqlır doğru reaktsiyadır", - dedi Çernâk.
The Atlantic Amerika neşri Ukrayina Mudafaa naziri Oleksiy Reznikovnıñ "Qırımnı uruşsız azat etermiz" sözlerini ketire.
Ukrayina Mudafaa naziri Oleksiy Reznikov
Maqaleniñ müellifleri qayd eteler ki, ukrayinalılar yarımadanıñ yahşı qorulğanını añlaylar şunıñ içün yalıñız arbiy qarşı ücüm aqqında degil, em de "arbiy-siyasiy" azat etilüv aqqında da deyler.
"Yarımadağa ketken avtomobil, demiryol ve suv yolları qapatılğanda ve arbiy infraterkip uçucısızlar tarafından atekeş tutulğanda rusiyeliler, hususan da yañı kelgenler, başqa bir yerde yaşamaq daa yahşı olğanına emin olacaqlar", - dep yazıla "Qarşı ücüm" adlı maqalede.
İçtimaiy ağlarda, köpürde ve yarımadanıñ diger rayonlarında yüz bergen patlamalardan soñ bazı Qırım sakinleri yarımadanı Rusiye ile bağlağan Keriç boğazından qaçqanı aqqında haber etile.
Mayısnıñ 1-nde ''United News'' telemarofonınıñ yayınında Ukrayina Mudafaa naziri Oleksiy Reznikov qarşı ücümge azırlıq basamağı yekünleneyatqanını, qarşı ücümniñ yeri ve tarihı ile bağlı soñki qararnı ise Baş ştab qabul etecegini bildirgen edi.
Qırım uquq qoruyıcı gruppasınıñ reberi Olga Krıpnik, yarımadadaki vaziyetni qıymetlendirip, Qırım cemiyetiniñ monolit olmağanını qayd ete.
Qırımda Ukrayinağa destek büyüktirOlga Skrıpnik
"Birinci gruppa, başlıca Ukrayina tarafdarı olğanlar. Şu cümleden, Ukrayinanı desteklegenleri içün memuriy ve cinayet davalar ile taqip etilgen şahıslar. Memuriy sebeplerden açılğan davalarınıñ sayısına köre, Qırımda Ukrayinağa destek büyük olğanını ve işğal akimiyet Qırımnıñ rusiye olğanına dair propaganda resmini yaratmaq içün bu insanlarnı taqip etmege ve qorqutmağa tırışqanını köremiz", - dey Skrıpnik.
Qırım uquq qoruyıcı gruppasınıñ reberi Olga Skrıpnik
O, Qırımda Ukrayina Silâlı Quvetlerini desteklegen türlü yazılar sıq-sıq rastketirmek mümkün olğanını hatırlata. Anda türlü şekillerde yerastı areketleri faaliyet köstere.
Başlıca Rusiyeniñ qızğın tarafdarı olğan daa bir kategoriya şimdi kerçekten ketmege tırışaOlga Skrıpnik
"Kerçekten de, ealiniñ bir qısmı işğalden azat etilüvni beklemekten ğayrı Qırımnıñ tez vaqıtta azat etilmesi içün faal şekilde areket de ete. Başlıca Rusiyeniñ qızğın tarafdarı olğan daa bir kategoriya şimdi kerçekten ketmege tırışa. Hususan küç organları, FSB ile bağlı olğan aileler. Ve telâşqa qapınğanlar, Ukrayina Silâlı Quvetleri tarafından darbeler endirile bilecegine dair malümat oquğan şahıslar", - dey o.
O, Qırım sakinleri Novofedirivkadaki uçaq alanına, Aqyardaki neft bazasına darbeler endirilgen soñ "dalğalar" şeklinde ketkenini qayd ete.
Aqyarda Kazaçya körfezindeki neft bazasında yanğın, 2023 senesi aprelniñ 29-ı
Olga Skrıpnikniñ sözlerine köre, Qırım sakinleriniñ eñ sıq darqalğan talaplarından biri Ukrayianıñ bücet, içtimaiy saalarda çalışqan insanlar ile bağlı ne yapacağı ile bağlıdır.
"İçtimaiy saalarğa kelgende, esasen Ukrayina bu suallerniñ cevaplarını o qadar aydın şekilde şekillendirmedi. Yuqarı Radada kollaborantlıq meseleleri ile bağlı türlü teşebbüsler bar ve bu Ukrayinanıñ er kesni taqip etmek niyetinde olması ile bağlı Rusiye tarafından mazakereler, qorqutuvlar ve aldatmalarğa yer qaldıra. Bu sualler kerçekten alâ aktualdir", - dey Skrıpnik.
Siyasetşınas Borıs Kuşnırçuk, bazıda yayınlanğan resmiy malümatnıñ bir qısmı duşmanğa qarşı psihologik tazyıq yaratmaq içün yapılğanını añlamaq kerek, dep saya.
Rusiyelilerge psihologig tazyıq yaratamızBorıs Kuşnırçuk
"Rusiyelilerge psihologik tazyıq, şu cümleden cezanıñ qaçınılmazlığı müitini yaratamız. Ve cezanıñ qaçınılmazlığı mevzusı ne qadar sıq eşitilse, bu formula o qadar maddiy köpmonent qazanır", - dey Kuşnırçuk.
O, qararlıştırılğan qarşı ücüm çerçivesinde er bir bildirüv duşmanğa qarşı küreş içün qullanıla bilir, dep saya.
Siyasetşınas Borıs Kuşnırçuk
"Ve kimse [bunı] bilmey, belki de, bir yönelişte ücüm ğayesi yaratmaq kerek, ücüm ise başqa bir yönelişte başlaycaq. Malümat şamatası bazıda kerçek ğayelerni ve yönelişlerni bere bilir ve olardan birisi kerçekten doğru ola bilir", - dey o.
Amma onıñ sözlerine köre, "cenk cenktir" ve işğalciler Qırımnıñ azat etilmesi qaçınılmaz olğanı aqqında bildirüvlerge diqqat etmeliler.
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.