Yaltada fevralniñ 24-nde küçlü yel köterildi, yağmur yağdı, dağlarğa yaqın yerlerde ise sılaq qar yağdı. Deñizde furtuna köterildi, gemiler yalığa yaqın tura. Bu aqta yerli sakinler Qırım.Aqiqatqa tarif etti.
Başta şeerde kök quşağı köründi, soñra yağmur ve sılaq qar yağdı.
İçtimaiy ağlarda Yalta sakinleri küçlü yel aqqında da bildire. Olarnıñ aytqanına köre, yel evlerniñ damlarını qoparıp ala.
«Yaltağa ketem, maşinamnı alıp kete», – dep yazdı Alina Verzoskaya Facebooktaki «Yalta – sevgimdir» gruppasında.
Küçlü yel aqqında Massandra, Gaspra ve Livadiya sakinleri de bildire.
Yaltada ava bozulğanı içün «Yalta-Gorka» alatlı yolunıñ işi toqtatıldı.
Aqyarda fevralniñ 24-nde saba furtunalı ava sebebinden parom keçiti çalışmay. Fevralniñ 24-nde üyleden soñ Aqyarda körfezdeki yolcu katerleriniñ areketi toqtatıldı.
Qırımdaki sinoptikler fevralniñ 24-25-nde avalar bozulacaq, dep tenbiledi. Yarımadada qıyın ava vaziyetleri beklenile: küçlü yağmur, sılaq qar, bazı yerlerde küçlü yağanaqlar, klegey buz, yollarda buzlavuq.