Ukrayina Tış işler nazirligi Rusiye mahkemesiniñ qırımtatar faalleri Timur Yalkabov ve Lenur Seydametovğa çıqarğa ükümlerni izaatladı.
"İşğalciler Ukrayinada er kün silâsız adamlarnı öldürgende, şeerlerni yıqqanda muvaqqat işğal etilgen Qırımda Rusiye Ukrayina vatandaşlarına qarşı basqılarnı devam ete. Rusiye mahkemesi qırımtatar faalleri Timur Yalkabov ve Lenur Seydametovnı 17 ve 13 yıl apis cezasını mahküm etti", - dep yazdı TİN yolbaşçısınıñ birinci muavini Emine Ceppar.
"Rusiye içün halqara uquq ve halqara gumanitar uquq kibi añalamlar ya da er angi umumiy qabul etilgen qaide ve printsipler çoqtan yoq. Al-azırda bu memleket ile tedaiylengen tek şey arbiy cinayetçi", - dep qayd etti o.
Для #Росії вже давно перестали існувати поняття міжнародного права та міжнародного гуманітарного права, чи будь-які загальновизнані норми та принципи. Військовий злочинець - це єдине, що зараз асоціюється з цією країною. 2/2
— Emine Dzheppar (@EmineDzheppar) March 22, 2022
Rostov-na-Donudaki Cenübiy bölgeniñ arbiy mahkemesi qırımtatar faalleri Timur Yalkabov ve Lenur Seydametovnı "Qırımda terroristik faaliyetiniñ teşkil etilmesinde ve teşkilâtta iştirak etüvde" qabaatlı tanıp, uzun apis müddetke mahküm etti.
2021 senesi fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.