Cumaertesi künü, fevralniñ 20-nde, «Veciye Kaşka davasınıñ» mabüsi Kazim Ametovğa Suvuq Sala (Gruşevka) köyüne «Rusiye polisi qıyafetinde eki belli olmağan kişi» keldi. Bu aqta Qırımtatar Milliy Meclisiniñ reisi Refat Çubarov Facebook saifesinde bildirdi.
Onıñ malümatına köre, kelgenler Ametovdan prokuraturağa kelmesini talap etip, «şartlı olaraq mahküm etilgen statusında areket qaidelerini» bozdı, dep bildirdi.
«Kazim Ametov «polis hadimleriniñ» talapları qanunğa uyğun olğanından şübhelenip, Rusiyeniñ Qırım işğali şaraitlerinde qanunlar zaten yoq, er ay qayd olğan Rusiye Federatsiyasınıñ Cezalarnı yerine ketirüv federal hızmetiniñ hadimine telefon etti. O, «polis» talaplarına şaşıp, Kazim Ametovdan olarğa telefonını bermesini rica etti», – dep yazdı Çubarov.
Meclis reisiniñ aytqanına köre, Cezalarnı yerine ketirüv federal hızmetinen laf etken soñ polisler ketti.
«Kazim Ametovnıñ adisesi qorantası, soy-sopları ve qomşularını qasevetlendirdi. Biz, Kazim Ametovnıñ tuvğanları kibi, Rusiye quvetçileriniñ siyasiy mabüsniñ ayatı ve sağlığı içün telükeli ola bilecek provokatsiya ıntıluvını red etmeymiz», – dep yazdı Çubarov.
Rusiye quvet organları «Veciye Kaşka davasınıñ» mabüsine kelgenlerini izaatlamadı.
Oña efsane dey ediler. Veciye Kaşkasız üç yıl (fotoresimler)
2020 senesi dekabrniñ 4-nde «Veciye Kaşka davasınıñ» 63 yaşında mabüsi Kazim Ametovnıñ evinde Rusiye quvetçileri tintüv keçirdi. İlk malümatqa köre, anda «tahqiqat tedbirleri» oldı. Qırımtatar milliy areketiniñ faali Nariman Celâl bildirgenine köre, FSB hadimleriniñ tintüvi Ametovnıñ oğlunen bağlı.
Ametov, evlerinde keçirilgen tintüv tafsilâtları aqqında tarif etti.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.