Ameldeki Ukraina prezidenti Petro Poroşenko, ekzit-pollar aydınlatqan saylavnıñ ilk basamağınıñ neticeleri onı “eyforiya” alına ketirmegenini ayttı.
“Men eyforiyanı sezmeyim. Cemiye şimdiki ükümetke yapqan işaretlerni yahşı añlayım. Bu men ve taqımım içün ciddiy bir derstir. Ve soñki yılları yapqan hatalarımız üzerinde çalışmağa bir sebeptir”, - dedi Poroşenko, dep bildire Radio Svoboda.
O, “saylavnıñ birinci basamağında qandırıp olamağanlarnen ciddiy ve teren muzakerege azır” olğanını qoştı.
Bundan ğayrı Poroşenko, martnıñ 31-inde keçken saylavnen ukrainler Rusiye stsenariyini bozdı dep ayttı.
“Rusiyeniñ Poroşenkonı ekinci basamaqta körmege nyeti yoq edi. Amma bir şey becerip olamadılar. İşte, tahmin etmege musaade etiñiz, Rusiyeden dost ve duşmanlar, ukrainler saylavnıñ ekinci basamağınıñ stsenariyini de bozar. Körersiñiz”, - dedi Poroşenko.
Ukraina prezidenti namzeti, aktör ve şoumen Volodımır Zelenskıy, onen ekinci turğa kim çıqacağa farq etmegenini bildirdi.
“Ekinci turda kimnen olacağım farq etmey, şükür ki, bunı men degil, Ukraina halqı saylaycaq”, - dedi Zelenskıy.
Just had a quick chat with Volodymyr Zelensky as first polls showed him leading with 30% of all votes. He says he feels “fine,” which I’m sure is a big understatement. Also says he’s ready for the “big responsibility” that could be ahead for him should he win in second round. pic.twitter.com/5pd346YEcC
— Christopher Miller (@ChristopherJM) March 31, 2019
Saat 18:00-ğa Milliy ekzit-polnıñ bildirgenine köre, eñ çoq rey Volodımır Zelenskıyaldı - 30,4 %, şimdiki prezident Petro Poroşenko ekinci yerde ve 17,8% reylerni aldı.
Martnıñ 31-inde Ukrainada prezident saylavları keçe. Bu yer içün 39 namzet küreşe. Saylav bölükleri öz işini saat 8:00-da başladı ve 20:00-ğace çalışacaq. Merkeziy saylav komissiya, saylav neticelerini aprelniñ 10-unace ilân etmek kerek. Saylavnıñ birinci basamağında ğalebe qazanmaq içün bir de bir namzet 50%-dan reyni almaq kerek. Öyle birisi olmasa, saylavnıñ ekinci basamağı aprelniñ 21-inde keçirilecek. Qırımlılar qıta Ukrainada rey bere bile.