Ukraina Merkeziy Saylav Komissiyası, prezident saylavlarınıñ birinci basamağınıñ protokollarnıñ 100%-ını teşkerdi. Volodımır Zelenskıy yeñdi, ekinci yerde - şimdiki prezident Petro Poroşenko.
Zelenskıy içün öz reyini 30,24% saylavcılar berdi (5 million 713 biñ 825 adam). Poroşenko içün 3 million 14 biñ 532 saylavcı (15,95%).
Üçünci yerde Yuliya Tımoşenko - 2 miliion 532 biñ 230 kişi (13,40%).
Umumen saylavda 18 million 893 biñ 879 adam iştirak etti. Bülletenlerniñ 1,18%-ı bozulğan dep sayıldı.
Ukrainanıñ şimdiki prezidenti Petro Poroşenko devlet yolbaşçısı saylavlarında çetel saylav okrugında ğalip çıqtı. Bu aqta bu okrugda protokollarnıñ 100%-ını teşkergen Ukraina Merkeziy saylav komissiyasınıñ malümatları tasdıqlay.
Poroşenko saylayıcılarnıñ 38,93%-ını qazandı. Ekinci yerde – oyuncı ve alıp barıcı Volodımır Zelenskıy – 26,01%, üçünci yerde Anatoliy Gritsenko, onıñ içün saylavcılarnıñ 10,64%-ı rey berdi.
Ukrainada martnıñ 31-nde prezident saylavları olıp keçti. Saylayıcılarnıñ 63,5%-ı rey berdi.
Milliy exit poll malümatına köre, Volodımır Zelenskıy 30,6%, Petro Poroşenko – 17,8%, Yuliya Tımoşenko – 14,2%, Yuriy Boyko – 9,7%, Anatoliy Grıtsenko – 7,1%, Aleksandr Şevçenko – 0,5% qazandı.
Merkeziy saylav komissiyası saylavlarnıñ soñki neticelerini aprelniñ 10-na qadar ilân etmeli. Ekinci tur aprelniñ 21-nde olacaq.