Ukrainanıñ şimdiki prezidenti Petro Poroşenko devlet yolbaşçısı saylavlarında çetel saylav okrugında ğalip çıqtı.
Bu aqta bu okrugda protokollarnıñ 100%-ını teşkergen Ukraina Merkeziy saylav komissiyasınıñ malümatları tasdıqlay.
Poroşenko saylayıcılarnıñ 38,93%-ını qazandı. Ekinci yerde – oyuncı ve alıp barıcı Volodımır Zelenskıy – 26,01%.
Soñra «Grajdanskaya pozitsiya» firqasınıñ lideri Anatoliy Grıtsenko kele, oña 10,64% rey berildi, İgor Smeşko – 6,62%, Ruslan Koşulinskiy – 4,67%, Yuliya Tımoşenko – 4,21%. Yuriy Boyko – 3,91%, Aleksandr Vilkul – 1,80%. Diger namzetlerge saylayıcılarnıñ 1%-ından az qoltuttı.
Çetel okrugında 101 saylav bölügi çalıştı. Umumen 55031 saylayıcı rey berdi.
Merkeziy saylav komissiyasınıñ malümatına köre, protokollarnıñ 97,38%-ı teşkerilgen soñ Yuliya Tımoşenkoğa 2 mln 470 biñ insan (13,38%), Petro Poroşenkoğa – 2 mln 940 biñ saylayıcı (15,92%) rey berdi. Volodımır Zelenskıy lider olıp qala, oña saylayıcılarnıñ 30,26%-ı (5 mln 587 biñ insan) rey berdi.
Hatırlatamız, protokollarnıñ 95,56%-ı teşkerilgen soñ Petro Poroşenkoğa 2 mln 866 biñ saylayıcı (15,93%), Zelenskıyge ise – 5 mln 436 biñ insan (30,22%) qoltuttı.
Ukrainada martnıñ 31-nde prezident saylavları olıp keçti. Saylayıcılarnıñ 63,5%-ı rey berdi.
Milliy exit poll malümatına köre, Volodımır Zelenskıy 30,6%, Petro Poroşenko – 17,8%, Yuliya Tımoşenko – 14,2%, Yuriy Boyko – 9,7%, Anatoliy Grıtsenko – 7,1%, Aleksandr Şevçenko – 0,5% qazandı.
Merkeziy saylav komissiyası saylavlarnıñ soñki neticelerini aprelniñ 10-na qadar ilân etmeli. Ekinci tur aprelniñ 21-nde olacaq.
