Stratsburgda Avropa Şurası olğan binanıñ yanında, iyün 25-inde Ukrainağa qol tutuv ve Rusiye delegatsiyasınıñ PACEge qaytmasına qarşı aktsiya keçe, iştirakçiler "Qırım - bu Ukraina" , dep qıçıra. Bu merasimniñ videosını öz Facebook saifesinde ATR qırımtatar televizion kanalınıñ jurnalisti Elvina Seytbullayeva derc etti.
Aktsiya iştirakçiler ellerinde ukrain rejissöri Oleğ Sentsovğa qol tutuv köstergen plakatlarnı, ukraina ve qırımtatar bayraqlarnı ve Ukrainada ve Gürcistanda rusiye tecavuzına qarşı yazılarnı tuta.
Bundan evel qırımtatar Milliy Meclisiniñ reisi Refat Çubarov PACEniñ sanktsiyalarnı kirsetüv, hususan Rusiyege qarşı, tertibini qıyınlaştıruv qararı sebebinden Mustaqillik Meydanında umummilliy toplaşuv keçirmege teklif edi.
Avropa Şurası Parlament assambleyası iyünniñ 25-ne keçer gecesi keçirilgen toplaşuvında PACE qaidelerini deñiştirgen ve sanktsiyalarnı qullanuv tertibini, hususan Rusiyege qarşı, qıyınlaştırğan qararğa qoltuttı. Buña 118 PACE azası rey berdi, 62-si qarşı çıqtı, 10-u bitaraf qaldı.
Rusiye eyyeti Assambleya sessiyalarında 2015 senesi yanvar ayından itibaren, eyyetniñ vekâletleri ciddiy şekilde sıñırlanğan soñ, iştirak etmey.
Ukraina aq qorçalayıcılarınıñ fikirince, Rusiye eyyeti Avropa Şurası Parlament assambleyasına qaytsa, Rusiyeniñ teşkilât talaplarına riayet etmegen taqdirde bu devletlerara teşkilâtnıñ «ahlâqiy teslimiyeti» olacaq. Bu aqta aq qorçalayıcı teşkilâtlarınıñ PACE tertip, immunitet ve qurulış işleri komitetine, Avropa Şurası iştirakçi memleketleriniñ milliy eyyetlerine yapqan açıq muracaatında aytıla.
Muracaatqa 12 ukrain aq qorçalayıcı teşkilâtı, şu cümleden «Vatandaş serbestligi merkezi», «Kreml siyasiy mabüsleri soy-soplarınıñ birleşmesi», «KrımSOS», «Qırım aq qorçalayıcı gruppası», «İnsan aqları media teşebbüsi» qoltuttı.