Rusiye kontrolindeki Aqmescit Kiyev rayon mahkemesi qırımtatar faali İsmail Ramazanovnıñ babası Seitnibi Ramazanovğa Aqmescitteki Rusiye FSBsiniñ binası ögünde «toplaşuvda» iştirak etkeni içün para cezasını berdi. Bu aqta İsmail Facebookta haber etti.
Onıñ malümatına köre, mahkeme Seitnibi Ramazanovğa 5 biñ ruble para cezasını berdi.
«Rusiye uquq qoruyıcı organlarınıñ hadimleri tizgen şikâyet daa bir kere şaşırttı, anda 04.09.2021 sanında «körünişi asiyalı şahıslarğa oşağanlar tükânnıñ işini blok etti». Babamnı imaye etken advokat Aleksey Ladinniñ memuriy protokolnı tizgen polis hadimini ve şikâyet etken tükân hadimini mahkemege çağırmaq talabını mahkeme red etti. İstinaf olacaq. Babama qoltutqan er keske teşekkürler bildirem», – dep bildirdi Ramazanov.
Rusiye kontrolindeki Aqmescitniñ Kiyev rayon mahkemesi oktâbrniñ 8-nde sentâbrniñ 4-nde Aqmescitteki FSB binası ögünde «toplaşuvda» iştirak etkeni içün qırımtatarı Raim Seythalilovğa 3 biñ ruble para cezasını berdi.
Qırımda FSB binası ögünde insanlar tutuldı: neler oldı (+foto)
Rusiye polisi sentâbrniñ 4-nde Rusiye FSBsiniñ binası ögünde tutulğan qırımtatarlarğa qarşı 58 memuriy protokol tizdi.
İsmail Ramazanov 2018 senesi yanvarniñ 23-nde tutulğan edi, Novıy mir köyündeki evinde tintüv keçirilgen edi. Rusiye Tahqiqat komiteti, onı Zello internet-radiosı vastasınen ekstremizm teşviqatında qabaatladı.
İyülniñ 14-nde İsmail Ramazanov SİZOdan çıqtı, çünki bu cinaiy iş boyunca şeklengenler yarım yıldan ziyade nezaret altında qalmay.
İsmali Ramazanovğa qarşı cinaiy dava 2019 senesi yanvarniñ 16-nda qapatıldı. Daa soñra Ramazanovnıñ malümatı Rusiye «Terrorist ve ekstremist cedvelinden» silindi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.