Qara deñizde esir alınğan ve Aqmescitte apiske alınğan Ukraina askerleri Aqmescit SİZOsından çıqarıla, dep bildirdi noyabrniñ 29-nda aqşam Qırımtatar Milliy Meclisiniñ reis muavini, aq qorçalayıcı Ahtem Çiygoz.
«Şimdi alğan haberimizge köre, cenk esirleri Aqmescit SİZOsından çıqarıla», – dep yazdı Ahtem Çiygoz Facebookta.
Bu malümatnı Qırım.Aqiqatqa rusiyeli advokat Nikolay Polozov da tasdıqladı. Onıñ bildirgenine köre, Ukraina askerleri avuştırılacaq yer şimdilik belli degil.
TASS haber agentliginiñ Rusiyeniñ Qırım insan aqları vekâletlisi Lüdmila Lubinanıñ malümatına esaslanıp bildirgenine köre, Qara deñizde zapt etilgen ve Aqmescitte apiske alınğan Ukraina deñiz askerlerini Qırımdan Moskvadaki tahqiqat izolâtorına alıp keteler.
«Taqım erkânı Moskvağa avuştırıla. Davalarnı baqacaq tahqiqatçılarımızdan, Moskva tahqiqatçılarından büyük gruppa quruldı», – dedi Lubina.
Qırımtatar milliy areketiniñ faali Nariman Celâl cumaaqşamı künü aqşam Facebookta yazğanına köre, «bütün menbalar Ukraina askerleri anda (Aqmescit SİZOsında – QA) yoq degen fikirge keldi».
«Dostlar, yarın saba erte Aqmescit SİZOsına kelmege istegenler – lâğu etemiz. Niayet, bütün menbalar Ukraina askerleri anda yoq degen fikirge keldi. Olarnıñ tutılğan yerini bilip, yardımnı anda yollamağa çare taparmız. Teslim olmayıq, çalışmağa devam etemiz», – dep yazdı Celâl.
Noyabrniñ 29-nda qırımtatar faali Nariman Celâl Qara deñizde esir alınğan ve Aqmescitte apiske alınğan Ukraina askerleriniñ advokatları bergen malümatqa esaslanıp, deñizciler Qırımdan çıqarılıp, Rusiyeniñ paytahtı Moskvağa avuştırıla, dep bildirdi. Bu malümatnı Qırım.Aqiqatqa advokatlar Cemil Temişev, Emine Avamileva ve Ayder Azamatov tasdıqladılar.
Your browser doesn’t support HTML5
Qırım apiske alınğan Ukraina deñiz askerleri içün yardım toplay (video)
Daa soñra Qırımtatar Milliy Meclisiniñ reis muavini Ahtem Çiygoz öz menbalarına esaslanıp, Qara deñizde esir alınğan ve Aqmescitte tevqif etilgen Ukraina askerleri Qırımda qala, dep bildirdi.
Rusiye akimiyeti tarafından bunı tasdıqlaycaq ya da inkâr etecek resmiy bir tefsiri şimdilik yoq.
Ukraina Yuqarı Radasınıñ insan aqları vekâletlisi Lüdmila Denisova Rusiye ombudsmeni Tatyana Moskalkovağa muracaat etip, Keriç boğazında FSB tarafından zapt etilgen Ukraina askerleri tutılğan yerni tez vaqıtta bildirmege talap etti.
Kreml kontrolindeki Aqmescitniñ Kiyev rayon mahkemesi 21 Ukraina deñizcisini 2019 senesi yanvarniñ 25-ne qadar apiske aldı. Keriç hastahanesinde bulunğan daa üç deñizcini Keriç şeer mahkemesi apiske aldı. Olar da 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile.
Keric burhanı süretlerde
Qırım Muhtar Cumhuriyetiniñ prokuraturası Rusiyeniñ FSBsi tarafından tutılğan Ukraina deñizcilerini cenk esiri olaraq tanıdı.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı. Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.
Ukraina telükesizlik hızmeti bildirdi ki, gemilerde Ukraina deñizcilerinen beraber Ukraina telükesizlik hızmetiniñ eki hadimi bar edi.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.