ABD-niñ Avropada telükesizlik ve işbirlik teşkilâtındaki temsilciligi Rusiyeni Qırımda «esassız ve intiqam alıcı basqılarnı» toqtatmağa ve qırımtatar faali Nariman Celâlnı ve diger qırımtatarlarnı azat etmege çağırdı.
«Sentâbrniñ 3-nde ve 4-nde rus işğalci organları beş qırımtatarnı yaqaladı. Olarnıñ arasında alâ daa Qırımda yaşağan Qırımtatar Milliy Meclis azası Nariman Celâl. Celâlnıñ advokatnıñ bildirgenine köre, yaqalanğan soñ ilk 24 saat devamında aş, suv ve advokatsız el buğavında ve başında çuvalnen onı itiraf ettirecek olğanlar. Oña qarşı 15 yıl apis cezasını közde tutqan qabaatlav, avgustnıñ 23-nde Qırım platforması sammitinde iştirak etmesi içün intiqam kibi sayıla. Ayrıca, Celâl ile beraber yaqalanğan eki erkek, eki doğmuş ağa-qardaş Aziz ve Asan Ahtemovlar iskencelerge oğratılğanı aqqında bildirmelerden raatsızmız», – dep yazıla ABD-niñ Avropada telükesizlik ve işbirlik teşkilâtındaki missiyası reberiniñ muvaqqat muavini Elizabet Rozenştok-Sillerniñ bildirüvinde.
Qayd etti ki, Rusiye suistimal etkeni aqqında bildirmeler teessüf ki, Rusiye Federaal telükesizlik hızmetiniñ siyasiy sebeplerden işğal etilgen Qırımda tutqan diger qırımtatar ve ukrain mabüsleriniñ ikâyelerinen aynıdır.
«Rusiyeni Nariman Celâl, Aziz ve Asan Ahtemovlar, Eldar Odamanov ve Şevket Üseinovnı ve 100-den ziyade diger siyasiy mabüslerni deral azat etmege çağaramız. Rusiye qırımtatarlarğa qarşı esassız ve intiqam alıcı basqılarını toqtatmalı», – dep yazıla bilidrmede.
Your browser doesn’t support HTML5
Рефат Чубаров – о репрессиях на полуострове
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Advokat Ayder Azamatovnıñ Qırım.Aqiqatqa bildirgenine köre, Aqmescitteki mahkeme Qırımda raatlıq künleri Rusiye quvetçileriniñ tintüvleri vaqtında tutulğan Şevket UseinovveEldar Odamanovnı sentâbrniñ 6-nda Rusiye Memuriy uquq bozuluvları kodeksiniñ 19.3 maddesine istinaden (polis, arbiy, FSB organları hadiminiñ qanuniy emrine riayet etmeme) 14 ve 15 künge apiske aldı.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.