Rusiyeniñ Rostov-na-Donu şeerindeki Şimaliy-Kavkaz okrugınıñ arbiy mahkemesi mayısnıñ 29-nda qırımtatar vatandaş jurnalisti, bloger Nariman Memedeminovnıñ davasını iyünniñ 10-nda baqmağa qarar aldı.
Bu aqta advokat Emil Kurbedinov Qırım.Aqiqat mühbirine bildirdi.
Advokatnıñ aytqanına köre, mahkeme Memedeminovnıñ imayesi bergen davanı prokurorğa qaytarmaq muracaatını körmemezlikke urdı.
Kurbedinovnıñ qayd etkenine köre, ne o, ne de diger advokat Edem Semedlâyev tahqiqat tedbirleriniñ soñuna davet etilmedi. Bu ise Rusiye Ceza-protsessual kodeksinde bar. Tahqiqatçı tayin etilgen advokatnı celp etti.
Memedeminov mahkemede Aqmescit SİZOsından video bağı vastasınen iştirak etti. Kurbedinovnıñ aytqanına köre, sağlıq vaziyeti stabil.
«Özüni bir qarar is ete. Sağlı problemleri, hususan aşqazan-içekler ve bazı diger problemleri bar. Amma ameliyattan soñ daa yahşı oldı», – dep qayd etti advokat.
Mayısnıñ 7-nde Kreml kontrolindeki Qırım Yuqarı mahkemesi Nariman Memedeminovnıñ sıñırlav tedbirini 2019 senesi iyünniñ 15-ne qadar uzattı.
2018 senesi martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.