Vatandaş jurnalisti, bloger Nariman Memedeminovnıñ imayesi davasınıñ Qırım prokuraturasına qaytarılması aqqında muracaat etken edi, çünki qabaatlayıcı tarafından bozuvlar oldı. Advokat Emil Kurbedinovnıñ aytqanına köre, oña ve müvekkiline dava boyunca qabaatlayıcı qararlar berilmedi, bu ise «imaye aqqınıñ bozuluvı» sayıla. Bu aqta o, Qırım.Aqiqat mühbirine tarif etti.
«Mahkeme oturışuvı vaqtında Nariman qabaatlav qararı oña alâ daa berilmegenini bildirdi. Mayısnıñ 13-nde SİZO hadimi oña qabaatlav qararını ketirdi, lâkin o ondan özüni tanıtmasını rica etkende qadın red etip, «pek aqıllı olğanını» ayttı. O, açuvlanıp, Nariman qabaatlav qararını almağa istemegenine dair akt azırlaycağını bildirdi. Bu qabaatlav qararı alâ daa ne advokatta, ne Narimanda bar», – dep tarif etti advokat.
Kurbedinovnıñ aytqanına köre, müvekkili prokuraturağa ve SİZO yolbaşçısı Sergey Berejnoyğa ariza berdi.
«Narimanğa qabaatlav qararınıñ vaqtında berilmemesi onıñ imaye aqqını boza ve davanı prokuraturağa qaytarmaq içün sebep ola. Bugün mahkeme bunı ögrenip, davanı qaytarmağa mecbur», – dedi advokat.
Qırım.Aqiqat advokatnıñ aytqanlarınen bağlı prokuratura izaatlarını almağa tırışa.
Bugün Aqmescit SİZOsında Şimaliy-Kavkaz okrugınıñ arbiy mahkemesi ile video bağı vastasınen qırımtatar blogeri Nariman Memedeminovnıñ davası boyunca ilk mahkeme oturışuvı keçirile.
Mayısnıñ 7-nde Kreml kontrolindeki Qırım Yuqarı mahkemesi Nariman Memedeminovnıñ sıñırlav tedbirini 2019 senesi iyünniñ 15-ne qadar uzattı.
2018 senesi martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
