Qırımtatar Qurultayı Merkeziy saylav komissiyasınıñ reisi Zair Smedlâ Aqmescitteki Muvaqqat tutuv izolâtorında eki kün tutulğan soñ azat etildi. Bunı "Qırım birdemligi" cemaat birleşmesi haber etti.
Faaller ve soy-sopları ile körüşüv vaqtında Zair Smedlâ Rusiye akimiyetiniñ areketlerini "qorqutuv aktsiyası" adlandırdı.
"Bu qorqutuv aktsiyası edi. Olarnıñ isteklerini añlaymız - meni sustırmaq isteyler. Susmaycağım. Küreş devam ete", - dedi Smedlâ.
Rusiyeniñ nezaretinde olğan Qurman rayon mahkemesi Qırımtatar Milliy Qurultayınıñ Merkeziy saylav komissiyasınıñ reisi Zair Smedlâğa 40 biñ ruble para cezasını berdi.
Bundan ğayrı Smedlâ "natsist timsalleriniñ propagandası" ile qabaatlana. 2014 senesi martnıñ 1-nde, o, Aqmescitteki kenassanıñ divarları ile foto yerleştirgen edi. Şu divarğa natsist Almaniyanıñ svastikası qara boyanen yapılğan edi. Advokat Emine Avamileva añlatqanı kibi, bu kerçekten öyle edi, amma Smedlânıñ maqsadı bu vaqia aqqında er kesni haberdar etmek edi.
Qırımda Rusiye quvetçileri Qurman rayonında Qırımtatar halqı Qurultayınıñ Merkeziy saylav komissiyasınıñ reisi Zair Smedlânıñ evinde tintüv keçirdiler. Zair Smedlânıñ qızı Dinaranıñ bildirgenine köre, babasını yaqalağanlar ve Rusiye polisiniñ yerli bölügine alıp ketkenler. Yaqalav sebepleri şimdilik belli degil.
Qırımtatar halqı Qurultayınıñ Merkeziy saylav komissiyasınıñ reisi Zair Smedlânıñ evinde tintüv "qırımtatarlarnı qorqutmaq içün aselet yapıldı". Bunı Qırım.Aqiqatqa Qırımtatar Milliy Meclis reisi Refat Çubarov ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.