Kreml kontrolindeki Qırım Yuqarı mahkemesi mayısnıñ 7-nde apiske alınğan vatandaş jurnalisti, faal Nariman Memedeminovnıñ sıñırlav tedbirini uzattı. O, 2019 senesi iyünniñ 15-ne qadar nezaret altında qalacaq, dep haber ete Qırım.Aqiqat mühbiri.
İmaye tarafı Memedeminovnıñ tevqif müddetiniñ uzatılmasını temyiz etmege niyetlene. Bu aqta advokat Emil Kurbedinov Qırım.Aqiqat mühbirine bildirdi. O, dava Rusiyeniñ Rostov-na-Donu mahkemesinde baqılacaq, dep qoştı.
«İyün ayında Rostov-na-Donuda davanıñ baqılması başlanacaq, dep tahmin etemiz», – dep qayd etti Kurbedinov.
Salı künü, mayısnıñ 7-nde, Nariman Memedeminov 36 yaşını toldurdı.
2018 senesi martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.