Rusiyeniñ nezaretinde olğan Qırımnıñ Yuqarı mahkemesinde mudafaa ve qabaatlav tarafları "gaz borusında diversiya davası"nıñ mabüsi qırımtatar faali ve siyasetçisi Nariman Celâlnı sorğuğa çektiler. Bunı "Qırım birdemligi" cemaat birleşmesi haber ete.
Celâl tevqif etilgen ve tahqiqat başlanğan anden adiselerni tafsilâtlı aytıp berdi. Siyasetçi tahqiqat zamanı yüz bergen bir çoq "bozuvlarğa" diqqat çekti. Onıñ omür arqadaşı Leviza Celâlova bildirdi ki, Narimannıñ mahkemede aytqanına köre, oña "şübeli" statusına dair malümat bermegenler.
Nariman Celâl, Anğara köyündeki gaz borusını patlatmağa planlaştırğan tanışları olmağanını añlattı. Bundan ğayrı bu dava boyunca qabaatlanğan diger mabüsler Asan ve Aziz Ahtemovlarnı da çoqtan tanığanını ve olarnıñ arasında kefillik munasebtleri olmağanını qoştı.
"Qırımnıñ statusı ile bağlı noqta-i nazarımnı iç bir vaqıt gizlemedim, amma buña baqmadan qanunsız areketler yapmaq niyetinde asla degil edim", - dedi o.
Evel "Nariman Celâl davası"nıñ mabüsi Aziz Ahtemov mahkemede qabaatını ikence altında tanığanını bildirdi.
Evel Rusiyeniñ nezaretinde olğan Qırımnıñ Yuqarı mahkemesi qırımtatar siyasetçisi ve faali Narima Celâlov, ağa-qardan Aziz ve Asan Ahtemovnıñ tevqif müddetini iyülniñ 26-na qadar uzattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.