Qırımda tevqif etilgen qırımtatar faali ve siyasetçisi Nariman Celâlnıñ tevqif müddeti 2021 senesi yanvarnıñ 23-nede uzatıldı. Bunı Qırım.Aqiqat mühbirini advokat Nikolay Polozov bildirdi.
Qararnı Rusiyeniñ nezaretinde olğan Aqmescit Kiyev rayon mahkemesiniñ qadısı Yevgeniy Pronin çıqardı.
"Mahkeme oturışı başlanğan soñ birden qapalı olacağı belli oldı. Çünki oktâbrniñ 26-nda qadı Pronin qarar çıqarğan, çünki esnas iştirakçilerniñ telükesizligi içün havf bar eken. Mudafaa tarafı birden qadını red etti, çünki bu muracaatnıñ esaslandırılmasında esnasta iştirak eteceklerden biriniñ er angi tehdit ile bağlı niyetini tasdıq etken iç bir vesiqa ilân olunmadı", - dedi advokat.
Mudafaa tarafı qararnı temyiz etecek. Nariman Celâl özü mahkeme oturışında iştirak etmedi, çünki alâ daa psihiatrik hastahanede yata.
Oktâbrniñ 7-nde işğal etilgen Qırımda tevqif etilgen qırımtatar milliy Meclisnıñ reis muavini Nariman Celâl psihiatrik hastahanege mecburiy ekspertizağa yatqızıldı.
Your browser doesn’t support HTML5
Дело Наримана Джеляла: «диверсия» или месть за «Крымскую платформу»?
Bundan evel berilgen malümatqa köre, faalniñ qabaatlavı sertleştirildi, şimdi 20 yılğa qadar azatlıqtan marum etile bile. FSB, Nariman qabaatlanğan diversiya yapıluvına yardım etüvni diversiyada iştirak etüvge deñiştirip, qabaatlavnı sertleştirgen edi.
ABD OSCE missiyası Nariman Celâlnı ve üç doğmuş qardaş Ahtemovlarnı acele azat etmesine çağırğan edi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.