Rusiye kontrolindeki Qırım mahkemesi «Hizb ut-Tahrir davasınıñ» mabüsleri Oleg Fedorov, Azamat Eyupov ve Ernest İbragimovnıñ apis cezası iyülniñ 15-ne qadar uzattı. Bu aqta «Qırım birdemligi» cemaat birleşmesi advokatlar Lilâ Gemeci ve Siyar Paniçniñ malümatına esaslanıp bildire.
Qayd etilgenine köre, Oleg Fedorov hastahanede mahkeme belgilegen mahkeme-psihiatrik ekspertizasında olğanı içün oturışuvda kene yoq edi.
Qırımlılarnıñ advokatları bildirgenine köre, tahqiqat dava malümatlarında berilgen ekspertiza qararlarına esaslanıp, apiste tutuv müddetleriniñ uzatılması içün israr etti. Faqat şimdi fonografik tedqiqat neticeleri daa yoq. Advokat Lilâ Gemeciniñ fikirince, böyle etip tahqiqatnıñ mabüsler 2017 senesi bir toplaşuvğa barğanına dair lafları boş ola.
«İmaye mahkemeni qabaatlav muracaatı sebepsiz olğanına işandırmağa tırıştı, mabüsler qanunsız bir şey yapmağanını, Qırımdan ise ketmegenini ayttı. Bundan ğayrı, advokat Oleg Fedorov öz ağır dava boyunca mahkeme esnasında olmalı, dep ayttı. Mahkeme ise qabaatlav istegeni kibi qarar çıqardı», – dep haber ete «Qırım birdemligi».
Daa evel belli olğanına köre, Qırımdaki mahkeme apiske alınğan faal ve iş adamı Oleg Fedorovnı mecburiy mahkeme-psihiatrik ekspertizasına yolladı.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
Hizb ut-Tahrir davası
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.