Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ 8 er adam tutuldı. Bu aqta Qırım.Aqiqat mühbiri bildire.
Aluştada Ruslan Nagayev ve Eldar Kantemirov, Büyük Lambat (Malıy Mayak) köyünde Ruslan Mesutov, Körbek (İzobilnoye) köyünde Lenur Halilov, yerli din cemiyetiniñ reisi tutuldı. Halilov Aluştadaki «Hizb ut-Tahrir» bölügini qurğanında (Rusiye Ceza kodeksiniñ 205.5 maddesiniñ 1-inci qısmı) qabaatlana. Tahqiqatnıñ malümatına köre, bu bölükke Kantemirov ve Nagayev kire.
Qarasuvbazar rayonınıñ Zuya köyünde faal Ayder Cepparov, Qarasuvbazarda Riza Ömerov tutuldı. Babası Enver Ömerov saba erte Rostov-na-Donuğa ketkende tutıp alındı. Enver Ömerov qızı Fatma İsmailova, siyasiy mabüs Rustem İsmailovnıñ ömür arqadaşı, ile beraber Aqmescitteki birinci «Hizb ut-Tahrir davasınıñ» mahkeme oturışuvına kete edi.
FSB hadimi Enver Ömerov Keriçteki Rusiye İç işler nazirliginiñ idaresine alıp ketirilecek, dep bildirdi. Amma İsmailova anda kelgende babası ketirilmedi, dep aytqanlar. Enver Ömerovnıñ bulunğan yeri belli degil.
Aqmescit civarındaki Mamaq (Stroganovka) köyünde 2019 senesi martnıñ 27-nde kütleviy tintüvler neticesinde apiske alınğan siyasiy mabüs Ruslan Suleymanovnıñ qardaşı Eskender Suleymanov tutuldı. «Qırım birdemligi» cemaat birleşmesiniñ malümatına köre, tintüvni Aqmescitteki ekinci «Hizb ut-Tahrir davasınıñ» tahqiqat gruppasınıñ yolbaşçısı olğan Sergey Mahnev keçirdi. Tintüv vaqtında Mahnev Eskender Suleymanovnıñ davası qardaşınıñ davasınen birleştirilecek, dep ayttı.
Rusiye FSBsi tahqiqat tedbirleri 205.5 maddesi (terror teşkilâtınıñ faaliyetini teşkil etüv ya da iştirak etüv) boyunca cinaiy dava çerçivesinde keçirile ve «Hizb ut-Tahrir» teşkilâtınen bağlı, dep bildirdi.
Daa evel qırımtatar faalleri Qırımda Rusiye quvetçileri bir qaç rayonda tintüv keçire, dep bildirdi Facebookta.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.