Qırımda koronavirus pandemiyası sebebinden 1988 bala uzaqtan tasil tehnologiyaları vastasınen oquy, dep bildirdi Rusiye kontrolindeki Qırım ükümetiniñ tasil, ilim ve gençlik naziri Valentina Lavrik.
Müessisa saytında berilgen malümatqa köre, er künlik monitoring neticelerine köre, «bir umumtasil mektep, 26 teşkilâtta 75 sınıf ve orta zenaat tasil teşkilâtınıñ 2 gruppası uzaqtan tasil ala».
Müessise malümatına köre, 1 mektepten tasil teşkilâtı ve 9 mektepten evel gruppa qapatıldı.
«Böyle iş neticesinde çıqarılğan hulâsalarğa köre, tasil teşkilâtlarında ust yaş ocaları risk altında ve tasil teşkilâtlarında nizam seviyesi yeterli olmağan yerlerde vaziyet stabil degil», – dep qayd etildi haberde.
Rusiye kontrolindeki Qırım yolbaşçısı Sergey Aksenov mektep tatili bitken soñ yañı koronavirus dalğası beklenile, dep tahmin etti.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya yarımadada epidemiologik vaziyet eyilişmey, dep bildirdi.
Qırımda keçken künü 212 koronavirus hastası qayd etildi, umumen 7585 COVID-19 hastası qayd etildi. Aqyarda, yerli akimiyetniñ malümatına köre, 1798 insan yañı koronavirus yuqunçına oğradı, 1192 insan tüzeldi, 55 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.