Rusiye kontrolindeki Qırım yolbaşçısı Sergey Aksenov mektep tatili bitken soñ daa bir koronavirus dalğası olacaq, dep tahmin ete.
Bu aqta o, oktâbrniñ 21-nde Qırımda COVID-19 ile küreş operativ ştabınıñ toplaşuvında ayttı.
«Şimdi balalarnı tatilge yibersek, ana-babalar balalarnı evde tutmaycaq, añlaymız. Bu tatilden soñ üçünci dalğa (koronavirus – QA) olacaq. Bu müddet devamında balalar özleri qalacaq ve yañı hastalar olacaq», – dedi Aksenov.
Onıñ qayd etkenine köre, mektep talebeleri içün tatilni lâğu etüv meselesi de baqıldı, amma şimdilik bir şey lâğu etilmeycek.
Qırımda keçken künü 203 koronavirus hastası qayd etildi.
Umumen Qırımda, yerli akimiyetniñ malümatına köre, 7200 insan koronavirusqa oğradı, 113 kişi vefat etti.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayayarımadada epidemiologik vaziyet kerginleşe, dep bildirdi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
