Qırımtatar Milliy Meclisiniñ reisi Refat Çubarov, keçirilmesi mayısnıñ 2-ne ilân etilgen işğal etilgen Qırımğa taba yürüş Ukraina akimiyetinden razılıq almasını talap etmey, çünki aktsiya, Çubarovnıñ aytqanına köre, qanunğa uyğun ola, dep bildirdi.
Bu aqta Meclis reisi yanvarniñ 23-nde Qırım.Aqiqatqa ayttı.
«Bizim fikirlerimiz açıq edi, teşebbüs 2019 senesi dekabr ayında ilân etildi. O vaqıt künni daa aytmadıq, tünevin ise aydınlattıq. Akimiyet organları şimdilik seslenmedi. Bu bizim aktsiyamızdır. Ukraina qanunlarına köre, qanunğa uyğun aktsiyalar keçirilecek olsa, razılıq almağa kerekmey», – dep qayd etti Çubarov.
Onıñ aytqanına köre, aktsiyanıñ iştirakçilerini aytmağa daa erte.
«Şimdi çoq çalışamız ve belli azırlıqlar keçirilgenine qadar tafsilâtlarnı aytmaycaqmız. Mesleatlar keçirile ve şimdilik olar açıq degil», – dedi Meclis reisi.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola.
Refat Çubarovnıñ aytqanına köre, yürüş teşkilâtçıları yapqan areketlerini Ukraina akimiyetinen keliştirmege «tırışacaq».
Ukraina akimiyeti Meclis reberliginiñ malümatına açıq sürette şimdilik cevap bermedi.
Yanvarniñ 22-nde Çubarov Qırım yürüşi mayısnıñ 2-nde keçirilecek, dep ayttı. Meclis reisi, işğal altındaki yarımadağa küç qullanıp kireceklerini de inkâr etmey.
Rusiye kontrolindeki Qırım yolbaşçısı Sergey Aksenov ilân etilgen yürüşni provokatsiya dep adlandırıp, «sert qarşılıq kösterilecegini» vade etti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.